म्यानचेस्टर (एजेन्सी)– पोर्चुगिज जोसे माउरिन्होले म्यानचेस्टर युनाइटेडको प्रशिक्षकका रुपमा अविश्वसनिय कीर्तिमान बनाएका छन् । युनाइटेडले प्रिमियर लिगमा शनिबार फुलह्यामलाई ४–१ ले हराएको थियो । त्यो जित माउरिन्होको प्रशिक्षकका रुपमा टोलीका लागि ५० औं जित हो ।

शनिबार अघिका चार खेलमा युनाइटेड जित विहिन थियो । त्यो जितपछि माउरिन्होले भने कोसेढुंगा पुरा गरेका छन् । उनले युनाइटेडका महान प्रशिक्षक एलेक्स फर्गुसनलाई समेत पछाडि पारेका छन् । फुर्गसन भन्दा छिटो माउरिन्होले टोलीलाई प्रिमियर लिगमा ५० औं जित दिलाएका छन् ।

माउरिन्होले युनाइटेडलाई ९२ औं खेलमा ५० औं जित दिलाएका हुन् । सन् १९८६ नोभेम्बरमा युनाटेडको कमान सम्हालेका फुर्गसनले ५० खेलको जितका लागि १ सय १५ खेल सम्म कुर्नपरेको थियो ।

युनाइटेडका लागि फुर्गसन भन्दा छिटै ५० जितको कीर्तिमान बनाएपछि माउरिन्होले आफ्नो यसअघिको कीर्तिमानलाई भने तोड्न सकेनन् । माउरिन्होले चेल्सीको आफ्नो पहिलो कार्यकालमा ६३ औं खेलमा ५० औं जित निकालेका थिए । दोस्रो कार्यकालमा उनले ७३ खेलमा ५० खेल जितेका थिए ।

यो सिजन सन्तोषजनक प्रदर्शन गर्न नसकेको युनाइटेडले शनिबार भने सहज जित हासिल गर्दा एस्ले योङ, हुवा माटा, रोमेलु लुकाकु र मार्कोस रासफोर्डले गोल गरेका थिए ।