लन्डन (एजेन्सी)– इडेन हाजार्डलाई भविष्यमा पनि सेन्टर फरवार्डका एक्लै खेलाउने चेल्सीका प्रशिक्षक माउरिजियो सारीले संकेत गरेका छन् । म्यानचेस्टर सिटीविरुद्ध शनिबार हाजार्डले दोस्रो हाफमा उच्च प्रदर्शन गरेपछि सारीको यस्तो भनाई आएको हो ।

प्रिमियर लिगको साविक विजेता सिटीलाई चेल्सीले शनिबार २–० ले हराएको थियो । हाजार्डले पास मिलाएपछि एगोलो कान्टेले पहिलो हाफमा गोल गरेका थिए । दोस्रो हाफमा हाजार्डकै कर्नमा डेभिड लुइजले गोल गरेका थिए । जसले गर्दा पेप ग्वार्डिओलाको टोली यसपटक प्रिमियर लिगमा पहिलो पटक पराजित भएको थियो ।

सारीले भविष्यमा पनि हाजार्डलाई यसरी नै प्रयोग गर्ने बताएका छन् । ‘खेलको सुरुवातमा उनलाई केहि समस्या देखिएको थियो । तर दोस्रो हाफमा उनले उच्च प्रदर्शन गरेका थिए । उनी गोलको हकदार पनि थिए,’ सारीले भने, ‘मलाई लाग्छ यो सबैभन्दा राम्रो विकल्प हो । हामीले सिटीविरुद्ध जसरी खेल्यौं भविष्यमा केहि खेलमा त्यसरीनै खेल्ने कोशिस गर्नेछौं ।’

हाजार्डलाई यसरी प्रयोग गर्दा अल्भारो मोराटा पहिलो रोजाईमा हुने छैनन् । अर्का फरवार्ड ओलिभर जिरुडले सिटीविरुद्ध बेन्चबाट सुरुवात गर्नुपरेको थियो । दुई भन्दा सारीलाई एक स्टाइकर उतार्दै मिडफिल्डर थप्नु उपयुक्त सम्झे ।