लन्डन (एजेन्सी)– दुई महत्वपूर्ण खेलाडी नभएकै कारण चेल्सीसँग पराजित भएको मान्न म्यानचेस्टर सिटीका प्रशिक्षक पेप ग्वार्डिओलाले अस्वीकार गरेका छन् । प्रिमियर लिगमा सिटी शनिबार चेल्सीसँग २–० ले पराजित भएको थियो ।

चोटका कारण चेल्सीविरुद्ध नखेलेका सर्जियो अगुएरो र केभिन डी ब्रुएनबारे ग्वार्डिओलाले भने, ‘हामीले जति बेला खेल जित्छौं । त्यति बेला जो नखेले पनि कसैले सोध्दैनन् । चेल्सीसँगको हारअघि सिटी यो सिजन अपराजित रहेको थियो । शनिबारको हारपछि सिटी दोस्रो स्थानमा रहेको छ ।’

शनिबारको अर्को खेल जितेको लिभरपुल अंक तालिकाको शीर्षस्थानमा रहेको छ । स्पेनिस ग्वार्डिओला चेल्सीविरुद्ध गत सिजन भन्दा पनि टोलीले यो सिजन उच्च प्रदर्शन गरेको मान्छन् । त्यति बेला सिटीले चेल्सीलाई १–० ले हराएको थियो ।

‘कोहि नहुदा पनि यस्तो हुन्छ । जति बेला हामी जित्छौं, त्यति बेला को खेले वा खेलेनन् कसैले सोध्दैनन्, ‘ग्वार्डिओलाले भने, ‘हो हामी अगुएरो, ब्रुएन, बेन्जामिन मेन्डी वा अरु पनि खेलाउन चाहन्थे । तर, चेल्सीविरुद्ध टोलीले उच्च प्रदर्शन गर्यो । उनीहरु हुँदा हामी जित्थ्यौं भनेर कसैले ग्यारेन्टी गर्न सक्छ । कसलाई थाहा हुन्छ र ? ‘

उनले हारका वावजुद पनि टोलीको प्रदर्शनको प्रशंसा गरे । ‘गत सिजन भन्दा हामीले यो सिजन राम्रो खेल्यौं । तर गत सिजन ब्रुएनले बल पाए गोल गरे । खेल सकियो,’ ग्वार्डिओलाले थपे, ‘यसपटक हामीले केहि मौका गुमायौं । हामीले अर्को खेलमा सुधार गर्नुपर्नेछ । आउने फेब्रुअरीमा निकै कडा चुनौतिको सामना गर्नुपर्ने हुन्छ ।’

१६ चरणको खेलपछि ४२ अंकसहित लिभरपुल शीर्षस्थानमा रहँदा दोस्रो स्थानमा रहेको सिटीको १ अंक कम छ ।