टोटेनहमले लेस्टरलाई हरायो

लेस्टर (एजेन्सी) – इंग्लिस प्रिमियर लिग फुटबलमा टोटेनहम हस्टपरले लेस्टर सिटीलाई २–० ले पराजित गरेको छ । टोटेनहमलाई जिताउन ह्युङ मिन सन र डेल अलीले गोल गरे ।

लेस्टरको मैदानमा किङ पावर स्टेडियममा भएको खेलमा टोटेनहमले पहिलो हाफको इन्ज्युरी समयको थप गरिएको पहिलो मिनेटमा गोल गर्दै खेलमा १–० को अग्रता बनाएको थियो । उनले सर्जि अरेरको पासलाई गोलमा परिणत गरेका थिए ।

५८औं मिनेटमा डेल अलीले ह्युङ मिन सनको पासलाई गोलमा परिणत गर्दै टोटेनहमलाई २–० को सहज जित दिलाए । घरेलु मैदानमा लेस्टरले केही अवसर सिर्जना गरेपनि त्यसलाई सदुपयोग गर्न नसक्दा पराजित हुन पुग्यो । टोटेनहमले पनि केही मौका खेर फालेको थियो ।

जितपछि टोटेनहम ३६ अंक जोडेर लिगको तेस्रो स्थानमा यथावत छ । पराजित लेस्टर २२ अंक जोडेर नवौं स्थानमा छ । ४२ अंकसहित लिभरपुल लिगको शीर्ष स्थानमा रहँदा सिटी ४१ अंकसहित दोस्रो स्थानमा छ । ३४ अंक रहेको चेल्सी चौथोमा छ ।