लन्डन (एजेन्सी) –लन्डन क्लब चेल्सीले इंग्लिस प्रिमियर लिग फुटबलमा म्यानचेस्टर सिटीलाई सिजनको पहिलो हार चखाएको छ । शनिबार राति भएको खेलमा चेल्सीले सिटीलाई २–० ले पराजित गर्दै प्रिमियर लिगमा सिटीको अपराजित यात्रामा पुर्णविराम लगाएको हो ।

सिटी पछिल्लो १५ खेलमा १३ जित र २ बराबरीसँगै लिगमा अपराजित रहेको थियो । चेल्सीको मैदान स्टामफोर्ड ब्रिजमा भएको खेलमा सिटीलाई हार चखाउन एनगोलो कान्टे र डेभिड लुइजले गोल गरे । दुवै गोल पहिलो र दोस्रो हाफमा सम्भव भएको हो ।

प्रतिस्पर्धात्मक बनेको खेलमा घरेलु टोली चेल्सीले ४५औं मिनेटमा एङ्गोलोको कान्टेको गोलबाट खेलमा अग्रता बनाएको थियो । कान्टेले इडेन हजार्डले पेनाल्टी बक्सभित्रबाट उपलब्ध गराएको पासलाई पेनाल्टी बक्सभित्रबाटै वान टचमा सुन्दर  गोल गरेका थिए ।

चेल्सीले ७८औं मिनेटमा अग्रता दोब्बर पार्यो । इडेन हजार्डकै कर्नरमा डेभिड लुइजले हेडमार्फत सुन्दर गोल गरेका थिए । त्यसपछि दुवै टोलीले गोलका केही मौका पाएपनि सदुपयोग गर्न नसक्दा चेल्सीले खेल २–० ले आफ्नो पक्षमा पार्न सफल भयो ।

सिटीले गोलका केही मौकाहरु सिर्जना गरेपनि चेल्सीको बलियो रक्षापङ्ति तोड्न नसक्दा लिगमा पहिलो हार बेहोर्न बाध्य बन्यो । जितपछि चेल्सी १६ खेलबाट ३४ अंक जोडेर तालिकाको चौथो स्थानमा यथावत छ । चेल्सीसँगको हारसँगै सिटीले शीर्ष स्थानमा उक्लने मौका गुमाएको छ । सिटीको १६ खेलबाट ४१ अंक छ ।

शनिबार राति नै एफसी बोर्नमाउथलाई ४–० ले पराजित गरेको लिभरपुल ४२ अंकसहति लिगको शीर्ष स्थानमा रहेको छ ।