लन्डन (एजेन्सी) – इंग्लिस प्रिमियर लिग फुटबलमा लन्डन क्लब आर्सनलले हडर्सफिल्ड टाउनमाथि १–० को कठिन जित निकालेको छ ।

आर्सनलको घरेल मैदान इमिरेट्स स्टेडियममा भएको प्रतिस्पर्धात्मक खेलमा लुकास टोरेराले खेल सकिन ७ मिनेट बाँकी रहँदा गरेको गोल नै आर्सनलको जितमा निर्णायक बन्यो । आर्सनलले खेलमा बल पोजेसन राखेपनि गोल गर्न निकै हम्मे परेको थियो ।

आर्सनलले गोलका केही मौकाहरु पाएपनि हडर्सफिल्डका गोलरक्षकले विफल पारिदिएका थिए । तर, लुकास टोरेराले ८३औं मिनेटमा गोल गर्दै आर्सनललाई १–० को अग्रता दिलाए । लुकासले पिएरे हेनरिक औबामेयाङको पासलाई ओभरहेड किकमार्फत गोलमा परिणत गरेका थिए ।

त्यसपछि थप गोल निस्कन नसक्दा आर्सनल १–० ले विजयी हुन सफल भयो । जितपछि आर्सनलले १६ खेलबाट ३४ अंक जोडेको छ । पराजित हडर्सफिल्ड १० अंकसहित १८औं स्थानमा छ ।

प्रिमियर लिगकै अर्काे खेलमा वेस्टह्यामले क्रिस्टल प्यालेसमाथि ३–२ को प्रतिस्पर्धात्मक जित निकाल्यो । वेस्टह्यामले एक गोलले पछि परेको स्थिति उल्ट्याएर जित निकालेको हो ।

जेम्स अर्थरले गोल गरेपछि वेस्टह्याम खेलको छैटौ मिनेटमा पछि परेको थियो । पहिलो हाफसम्म १–० ले पछि रहेको वेस्टह्यामले दोस्रो हाफको सुरुमै गोल गर्दै खेललाई १–१ गोलको बराबरीमा ल्याएका थिए । वेस्टह्यामका रोबर्ट स्नोडग्रासले बराबरी गोल गरेका थिए ।

६२औं मिनेटमा जेभियर हर्नान्डेजले गोल गरेपछि वेस्टह्यामले खेलमा २–१ को अग्रता लिन सफल भयो । त्यसको तीन मिनेट पछि नै फिलिपे एन्डरसनले गोल गरेपछि वेस्टह्यामले खेलमा ३–१ को अग्रता बनायो ।

७६औं मिनेटमा प्यालेसका जेफ्री स्कुलुपले गोल गर्दै खेललाई ३–२ को अवस्थामा ल्याएपनि त्यसपछि थप गोल निस्कन नसक्दा वेस्टह्याम ३–२ गोल अन्तरले विजयी हुन सफल भयो । जितपछि वेस्टह्याम २१ अंक जोडेर १०औं स्थानमा छ । पराजित क्रिस्टल प्यालेस १२ अंकसहित १६औं स्थानमा रहेको छ ।

प्रिमियर लिगकै अन्य खेलमा बर्नली र कार्डिफले समान १–० को जित निकालेका छन् । बर्नली ब्राइटनमाथि तथा कार्डिफले साउथह्याम्पटनमाथि समान १–० को जित निकालेको हो ।