ओल्ड ट्राफोर्ड (एजेन्सी) – इंग्लिस प्रिमियर लिग फुटबलमा म्यानचेस्टर युनाइटेडले फराकिलो जित निकालेको छ । लिगअन्तर्गत शनिबार राति भएको खेलमा युनाइटेडले १० खेलाडीमा समेटिएको फुलहममाथि ४–१ को फराकिलो जित निकालेको हो ।

घरेलु मैदानमा युनाइटेडलाई फराकिलो जित दिलाउन एस्ले योङ, हुवान माटा, रोमेलु लुकाकु र मार्कस रासफोर्डले गोल गरे । पराजित टिमका लागि अवौबाकर कामराले एक गोल फर्काए ।

युनाइटेडले खेलको १३औं मिनेटमा एस्ले योङको गोलबाट खेलमा अग्रता बनाएको थियो । उनले मार्कस रासफोर्डको पासलाई सदुपयोग गरेका थिए । मार्कसकै पासमा हुवान माटाले २८औं मिनेटमा गोल गरेपछि युनाइटेडले खेलमा २–० को अग्रता बनायो ।

४२औं मिनेटमा हुवान माटाको पासमा रोमेलु लुकाकुले गोल गरेपछि युनाइटेडले फुलहममाथि पहिलो हाफमै ३–० को आरामदायी अग्रता बनाएको थियो ।

पहिलो हाफमा ३ गोल गर्न सफल भएको युनाइटेडले दोस्रो हाफमा एक गोल गर्दा एक गोल खान पुग्यो । ६७औं मिनेटमा एन्डर हेरेराले पेनाल्टी क्षेत्रमा अवौबाकरलाई फल गरेपछि फुलहमले पेनाल्टी पाएको थियो । जसलाई उनी आफैले गोल गर्दै खेललाई ३–१ को अवस्थामा ल्याएका थिए ।

एक गोल फर्काएलगत्तै फुलहम १० खेलाडीमा समेटियो । आन्द्रे अंगुइसा दोहोरो पहेलो काड खादै मैदानबाट बाहिरिएको थियो । ८२औं मिनेटमा मार्कस रासफोर्डले गोल गरेपछि युनाइटेडले फुलहममाथि ४–१ को फराकिलो जित निकाल्यो ।

जितपछि युनाइटेड १६ खेलबाट २६ अंक जोडेर छैटौं स्थानमा रहेको छ । पराजित फुलहम ९ अंकसहित पुछारमा छ ।