म्युनिख (एजेन्सी) –बोरुसिया डर्टमन्डले जर्मन बुन्डेसलिगामा आफ्नो अपराजित यात्रालाई कायमै राखेको छ । बुन्डेसलिगा अन्तर्गत शनिबार राति भएको खेलमा शीर्ष स्थानमा रहेको डर्टमन्डले साल्केलाई २–१ ले पराजित गर्दै लिगमा आफ्नो अपराजित यात्रालाई लम्ब्याएको हो ।

साल्केको मैदानमा भएको खेलमा डर्टमन्डलाई जिताउन थोमस डिलाने र जाडन सान्चोले गोल गरे । घरेलु टोलीका लागि ड्यानियल कालिग्रीले एक गोल फर्काए । डर्टमन्डले खेलको सातौ मिनेटमा थोमस डिलानेको गोलबाट खेलमा अग्रता बनाएको थियो । उनले मार्काे रिउसको पासलाई गोलमा परिणत गरेका थिए । प्रतिस्पर्धात्मक बनेको पहिलो हाफमा डर्टमन्डले १–० को अग्रता बनाएको थियो ।

६१औं मिनेटमा साल्केले बराबरी गोल फर्कायो । ५७औं मिनेटमा मार्काे रिउसले पेनाल्टी क्षेत्रमा विपक्षी खेलाडीलाई लडाएपछि साल्केले पेनाल्टीका अपिल गरेको थियो । रेफ्रीले भिएआरको सहायता लिदा खेल करिब ५ मिनेट रोकिएको थियो । अन्तत रेफ्रीले साल्केलाई पेनाल्टीको मौका दिए । जसलाई ड्यानियल कालीजिरी ६१औं मिनेटमा गोल गर्दै खेललाई १–१ गोलको बराबरीमा ल्याएका थिए । ७४औं मिनेटमा जेडन सान्चोले गोल गर्दै डर्टमन्डलाई २–१ को जित दिलाए ।

जितपछि डर्टमनन्ड १४ खेलबाट ११ जित र ३ बराबरीको नतिजासहति ३६ अंक जोडेर लिगको शीर्ष स्थानमा रहेको छ । जुन दोस्रो स्थानमा रहेको बायर्न म्युनिखको भन्दा ९ अंकले बढी हो । साल्के १४ अंक जोडेर १३औं स्थानमा छ ।

शनिबार राति नै भएको खेलमा डिफेन्डिङ च्याम्पियन बायर्न म्युनिखले नुर्नबर्गलाई ३–० ले पराजित गरेको छ । घरेलु मैदान एलिनाज एरिनमा बायर्नलाई सहज दिलाउन रोवर्ट लेवान्डोस्कीले २ तथा फ्रान्क रिवेरी एक गोल गरे ।

जितपछि बायर्न २७ अंक जोड्दै लिगको दोस्रो स्थानमा उक्लिएको छ । नुर्नबर्ग ११ अंकसहित रेलिगेसनको जोनको १६औं स्थानमा छ ।