एजेन्सी – मारियो मान्जुकिचले दोस्रो हाफमा गरेको निर्णायक गोलको मदतले युभेन्ट्सले शुक्रबार इटालियन सिरी ए को खेलमा इन्टर मिलानलाई १-० ले पराजित गरेको छ ।

खेलको ६६ औं मिनेटमा जोआओ क्यान्सेलोको क्रसमा हेडरमार्फत गोल गर्दै मान्जुकिचले युभेन्ट्सलाई महत्त्वपूर्ण तीन अंक दिलाएका थिए । यससँगै युभेन्ट्सले शीर्ष स्थानमा ११ अंकको अग्रता कायम गरेको छ । शनिबार नेपोलीले आफ्नो खेलमा जित दर्ता गरे यो अग्रता ८ अंकमा झर्नेछ । नेपोलीले शनिबार फ्रोसिनोनेको सामना गर्दैछ ।

खेलको पहिलो हाफमा रोबर्टो जिलार्डीनोको प्रहार पोस्टमा लागेर फर्कंदा इन्टर अग्रता लिनबाट चुकेको थियो । त्यसअघि ब्लेस माटुइडीको गल्तीमा माटियो पोलीटानोले पाएको अवसर सदुपयोग गर्न नसक्दा युभेन्ट्स भाग्यमानी सावित भएको थियो ।

डर्बी डे इटालीयाको नाम पाएको यस खेलमा युभेको जितसँगै अपराजित सुरुवातको कीर्तिमान पनि बराबरी भएको छ । १५ खेलमा १४ जित र १ बराबरीसँगै युभेले ४३ अंक जोडेको छ । युरोपको शीर्ष ५ लिगमा यो नै उत्कृष्ट सुरुवात हो । यसै सिजनमा पेरिस सेन्ट जर्मेन (पीएसजी) ले १५ खेलमा ४३ अंक जोड्दै कीर्तिमान बनाएको थियो ।

पराजयले इन्टरलाई भने तेस्रो स्थानमा नै कायम राखेको छ । इन्टर अंक तालिकामा युभेन्ट्सभन्दा १४ अंकले पछाडी छ । इन्टरले खेलमा अग्रता कायम गर्ने मौका पाएपनि सदुपयोग गर्न नसक्दा युभेट्सको अपराजित यात्रा कायम रहयो । अन्तिम मिनेटमा लौटारो मार्टिनेजले क्यान्सेलोको गल्तीमा अवसर पाएपनि त्यसको फाइदा उठाउन सकेनन् ।

युभेन्ट्सले पछिल्लो सात सिजन लिग उपाधिमा कब्जा गरेको छ । यस सिजन लिगको कुनै खेलमा पराजित नभएको युभेले घरेलु मैदानमा विगत ७ महिनादेखि पराजय भोगेको छैन । क्रिस्टियानो रोनाल्डोको आगमनले टोलीको आक्रमणमा थप टेवा पुगेको छ । युभेले १५ खेलमा ३२ गोल गर्दै ८ गोल खाएको छ ।