रियलमा रोनाल्डो नहुँदा आक्रमणमा समस्या

म्याड्रिड (एजेन्सी)– क्रिस्टियानो रोनाल्डो युभेन्ट्स पुगेयता रियल म्याड्रिडमा पूरा असर देखिएको छ । युरोपियन गोल्डेन बुट अवार्डमा रियलका अहिलेका खेलाडी २ सय ३२ औं स्थानमा रहनुले पनि रोनाल्डो नहुँदाको असर बुझ्न सकिन्छ ।

रियलका खेलाडी भन्दा २ सय ३२ खेलाडी अवार्डको सुचिमा आगाडि रहेका छन् । केरिम बेन्जिमा रियलका अहिलेका उच्च गोलकर्ता हुन् । उनले ला लिगामा यो सिजन ५ गोल गरेका छन् । अन्य खेलाडीका साथ बेन्जिमा २ सय ३३ औं स्थानमा रहेका छन् ।

त्यति मात्र होइन रियलका लागि दोस्रो सर्वाधिक गोल कर्ता रक्षक सर्जियो रामोस अन्य ४ खेलाडीका साथ रहेका छन् । यसबाट पनि रियलमा स्ट्राइकरको समस्या अनुमान गर्न सकिन्छ । रियलले यो सिजन एकदमै खराब सुरुवात गरेको छ । जसमा एल क्लासिकोमा पनि टोली बार्सिलानासँग पराजित भइसकेको छ ।

जुलेन लोपेटेगुईको बर्खास्ती पछि सान्टियागो सोलारीलाई रियलले प्रशिक्षक नियुक्त गरेका छ । त्यसपछि टोली लयमा फर्कने कोसिसमा छ । रोनाल्डोविना रियल निकै कमजोर देखिएको छ । अहिले रियल ला लिगाको पाँचौं स्थानमा रहेको छ । लिगको शीर्षस्थानमा रहेको बार्सिलोनाको भन्दा रियलको ५ अंक कम छ ।