काठमाडौं (हाम्रो खेलकुद) – गोलरक्षक देव लिम्बूले उत्कृष्ट प्रदर्शन गरेपछि एनआईबीएल फ्रेन्ड्स क्लबले त्रिभुवन आर्मी क्लबलाई पल्सर सहिद स्मारक ए डिभिजन लिगमा बिहीबार गोलरहित बराबरीमा रोकेको छ ।

पहिलो हाफको १४ औं मिनेटमा टंक बस्नेतले २५ यार्ड टाढाबाट गरेको प्रहारलाई गोलरक्षक देव लिम्बूले डाइभ गर्दै बचाए । २० औं मिनेटमा टंककै प्रहारलाई देवले विफल तुल्याए । ३६ औं मिनेटमा सन्तोष तामाङले पेनाल्टी क्षेत्रबाहिरबाट गरेको प्रहार गोलरक्षक देवले पन्च गरेर बचाए ।

३७ औं मिनेटमा दिनेश हेन्जनको कर्नरमा कप्तान टेकबहादुर बुढाथोकिको हेडर अनिल महर्जनले गोललाइनबाट बचाए । ३९ औं मिनेटमा विमल पाण्डेको हेडर पोस्टमा लाग्दा आर्मी अभागी आवित भयो । पहिलो हाफको अन्तिम मिनेटमा दिनेशको कर्नरमा विमल पाण्डेको हेडर पोस्टमा लागेर गोलरक्षक देवको हातमा पुग्यो ।

५४ औं मिनेटमा टेकबहादुरको पासमा दिनेश हेन्जनको प्रहार पोस्टभन्दा थोरै बाहिर गयो । ६४ औं मिनेटमा फ्रेन्ड्सका सन्जोग महर्जनले पेनाल्टी क्षेत्रभित्रबाट गरेको प्रहार दिनेश हेन्जनले गोललाइन नजिकबाट बचाए । ७१ औं मिनेटमा फोफानाको फ्रिकिकमा धिरज श्रेष्ठले बलसम्म पुग्न सकेनन् ।

खेलको ३ मिनेट समय बाँकी छँदा वैकल्पिक खेलाडी नवयुग श्रेष्ठको पासमा टंक बस्नेतको प्रहार देव लिम्बूले बचाए । रिबाउन्डमा सन्तोष तामाङको प्रहारले पोस्टको दिशा लिन सकेन । खेल अवधिभर आर्मीको झन्डै आधा दर्जन गोलमुखी प्रहार बचाएका देव खेलको म्यान अफ द म्याच भए ।

यस बराबरीसँगै आर्मीको ६ खेलमा ४ जित र २ बराबरीसँगै १४ अंक भएको छ । आर्मी अंक तालिकामा चौथो स्थानमा छ । यता फ्रेन्ड्सले भने ६ खेलमा ५ अंक जोडेको छ ।