बर्नली (एजेन्सी) – इंग्लिस प्रिमियर लिग फुटबलमा लिभरपुलले बर्नलीलाई पराजित गरेको छ । प्रिमियर लिग अन्तरगत बुधबार राति भएको खेलमा लिभरपुलले बर्नलीलाई ३–१ ले पराजित गरेको हो ।

बर्नलीको घरेलु मैदानमा भएको खेलमा लिभरपुलले एक गोलले पछि परेको स्थिति उल्ट्याएर जित निकालेको हो । लिभरपुलको जितमा जेम्स मिल्नर, रोबर्टाे फिर्मिनो र जरदान शाकिरीले गोल गरे । घरेलु टोलीका ज्याक कर्कले एक गोल गरे ।

प्रतिस्पर्धात्मक बनेको पहिलो हाफमा कुनै गोल हुन सकेको थिए । तर, ५४औं मिनेटमा घरेलु टोलीका ज्याक कर्कले गोल गर्दा लिभरपुल खेलमा पछि परेको थियो । एक गोलले पछि परेपछि लिभरपुलले उत्कृष्ट पुनरागमन गर्दै ३ गोल गर्न सफल भयो ।

६२औं मिनेटमा डिभोक ओरिजीको पासमा जेम्स मिल्नरले गोल गर्दै लिभरपुललाई खेलमा बराबरीमा ल्याएका थिए । ६९औं मिनेटमा भर्जिल भान डाइकको पासमा रोबर्टाे फिर्मिनोले गोल गरेपछि लिभरपुलले खेलमा २–१ को अग्रता बनायो । जित नजिक पुगेको लिभरपुलका लागि इन्ज्युरी समयको थप गरिएको दोस्रो मिनेटमा मोहम्मद सलाहको पासमा जरदान शाकिरीले गोल गर्दै लिभरपुललाई ३–१ को जित दिलाए ।

जितपछि लिभरपुलले शीर्ष स्थानको म्यानचेस्टर सिटीसँगको अंक दुरी २ मा झारेको छ । अपराजित रहेको लिभरपुलको १५ खेलबाट ३९ अंक छ । शीर्ष स्थानको सिटीको ४१ अंक छ । लिभरपुलसँग पराजित बर्नली ९ अंकसहित रेलिगेसन क्षेत्रको १९औं स्थानमा छ ।