एजेन्सी – फ्रान्स फुटबलले आयोजना गर्दै आएको प्रतिष्ठित अवार्ड फिफा ब्यालोन डी’ओरको उपाधि यसपटक रियल म्याड्रिड एवं क्रोएसियाका मिडफिल्डर लुका मोड्रिचले जिते ।

पछिल्लो एक दशक क्रिस्टियानो रोनाल्डो र लिओनेल मेसीले कायम गरेको वर्चस्व पनि उनले तोडे । उपाधि जितेपछि मोड्रीचले यसबीचमा रोनाल्डो र मेसीको वर्चस्वको कारण उपाधि जित्न नसकेका केहि खेलाडीलाई उपाधि समर्पण गरे । उनले रोनाल्डो र मेसीको उत्कृष्टताको प्रशंसा गर्दै यस वर्चस्व तोड्न आफू नै कारक बन्दा खुसी पनि व्यक्त गरे ।

‘ रोनाल्डो र मेसीले पछिल्लो एक दशक उत्कृष्ट फुटबल खेले । उनीहरुको लगातार राम्रो प्रदर्शनले एक अर्काबीच प्रतिस्पर्धा बढाएको थियो । यसकारण केहि महान खेलाडी यस उपाधिको हकदार भएपनि जित्न भने सफल रहेनन् ।’

‘ मेरो विचारमा जाभी र इनिएस्टा यो उपाधिको हकदार थिए । स्नाइडरले पनि एक समय उपाधि जित्नुपर्ने थियो, तर सफल हुन सकेनन् । तर अन्तत: मैले यो उपाधि जित्न सफल भएको छु । मान्छेहरुले केहि फरक चाहना राखेको छन् । यो समग्र फुटबल को जितको रुपमा लिएको छु ।’

‘ म आफ्नो उपाधि जितमा औधी खुसी छु । तर यो उपाधि म ती तीन खेलाडीलाई पनि समर्पण गर्न चाहन्छु जसले यसलाई आफ्नो बनाउन सकेनन् । उपाधिका हकदार भएपनि मतदानका आधारमा यो खेलाडी पछि परेका थिए ।’

मोड्रिचले विश्वकपमा क्रोएसियाला फाइनलसम्म पुर्याउन प्रभावशाली प्रदर्शन गरे । उनले विश्वकपमा उत्कृष्ट खेलाडी घोषित हुँदै गोल्डेन बल पनि प्राप्त गरे । ३३ वर्षीय मोड्रिचले गत सिजन रियललाई लगातार तेस्रो च्याम्पियन्स लिग उपाधि दिलाउने क्रममा महत्त्वपूर्ण प्रदर्शन गरेका थिए ।