एजेन्सी – फ्रान्सेली लिग वन अन्तर्गत आइतबार भएको खेलमा बोर्डोले पेरीस सेन्ट जर्मेन (पीएसजी) लाई बराबरीमा रोकेको छ । बोर्डोको घरेलु मैदानमा सम्पन्न खेल २-२ मा सकिएपछि पीएसजीको शत प्रतिशत जित यात्रामा पूर्णविराम लागेको छ ।

पीएसजीले पहिलो हाफको ३४ अौं मिनेटमा सुरुवाती अग्रता बनाएको थियो । ड्यानी अाल्भेसको पासमा नेयमारले गोल गर्दै पीएसजीलाई अगाडि बढाएका थिए । बलमा पकड बनाएपनि पीएसजीले आक्रमण बुन्न भने सकेन । पहिलो हाफमा पाहुना टोली १-० अग्रतामा थियो ।

दोस्रो हापको सुरुवातमा घरेलु टोली खेलमा फर्कियो । ५३ अौं मिनेटमा यान कारमाअोको पासमा जिमी ब्रायन्डले गोल गर्दै खेल बराबरीमा ल्याए । ६६ अौं मिनेटमा पीएसजीले पुन: अग्रता बनायो । जुलियन ड्राक्सलरको पासमा युवा स्टार किलियन एमबाप्पेले गोल गरे ।

खेलको ६ मिनेट समय बाँकी रहँदा बोर्डोले फेरि बराबरी गोल फर्कायो । म्याक्सिम पाउन्जेको पासमा अान्द्रिएस कर्नेलियसले गोल गरेपछि पीएसजी बराबरीमा अाएको थियो । अन्तिम समयमा पीएसजीले जित्ने मौका पाएपनि फरवार्ड चुपो मोटिङले अवसरको सदुपयोग गर्न सकेनन् ।

नेयमार दोस्रो हाफमा चोट बोकेपछि मैदान छाडेर गएका थिए । उनको स्थानमा ५७ अौं मिनेटमा चुपो मोटिङ अाएका थिए । एमबाप्पलेलाई पनि खेलदौरान ह्यामस्ट्रिङको समस्या देखिएको थियो । यद्यपि उनले पुरै समय खेले ।

यस नतिजासँगै पीएसजीको शत प्रतिशत जित यात्रा टुंगियो । १५ अौं खेलमा बराबरीमा रोकिएपनि पीएसजीले अंक तालिकामा फराकिलो अन्तर कायम राखेको छ । १५ खेलमा १४ जित र १ बराबरसहित ४३ अंक जोडेको पीएसजी दोस्रो स्थानको मोन्टपेलेरभन्दा १४ अंक अगाडि छ ।