न्यूयोर्क (एजेन्सी)– सुपर स्टार ज्लाटान इब्राहिमोभिचले आफ्नो अलस्टार ड्रिम ११ टोलीमा अधिकांश स्टार खेलाडीलाई समावेश गरेका छन् । यद्दपी उनको छनोटमा केहि आश्चार्यजनक रुपमा अपेक्षा गरिएका खेलाडी समेटिएका छैनन् ।

३७ वर्षे स्वीडेनका पूर्व कप्तानले पूर्व सहकर्मी युभेन्ट्सका महान खेलाडी जियालुइजी बुफोनलाई आफ्नो अल स्टार टोलीको गोलकिपरमा राखेका छन् । त्यस्तै लिलियन थोरम, थिएगो सिल्भा, आलेसान्द्रो नेस्टा र म्याक्सवेललाई रक्षापंक्तिको जिम्मेवारी दिएका छन् । मिडफिल्डमा पेट्रिक भियरा, जाभी, पाभेल नेदभेद रहेका छन् ।

इब्राहिमोभिचले अग्रपक्तिमा लियोनल मेस्सी, ब्राजिलियन एवंम बार्सिलोनाका महान खेलाडी रोनाल्डिन्हो र आफुलाई राखेका छन् । तर, उनको छनोटमा पाँच पटकका बालोन डी ओर विजेता क्रिस्टियानो रोनाल्डो परेका छैनन् ।

५ जनाको वैकल्पिक खेलाडी सुचिमा जुलियो सेजर, आन्द्रे इनियस्टा, फाबियो कानाभारो, जेनारो गाटुसो र क्लारेन्स सिर्डोफ रहेका छन् । इन्स्टाग्राममा ३६ मिलियन फलोअर रहेका इब्राहिमोभिचले आफ्नो अल स्टार सार्वजनिक गरेका हुन् ।

आयाक्स, इन्टर मिलान, युभेन्ट्स, एसी मिलान, बार्सिलोना, म्यानचेस्टर युनाटेडबाट खेलका इब्राहिमोभिच फुटबल इतिहासका एक उत्कृष्ट खेलाडीमा गनिन्छन् । क्लब र देशका लागि गरेर उनले ५ सय बढी गोल गरिसकेका छन् ।