काठमाडौं (हाम्रो खेलकुद) – पल्सर सहिद स्मारक ए डिभिजन लिग अन्तर्गत आइतबार अपराजित टोली हिमालयन शेर्पा क्लब र त्रिभुवन आर्मी क्लब आमनेसामने हुँदैछन् । खेल सातदोबाटोस्थित एन्फा कम्प्लेक्समा २:३० बजे हुनेछ ।

आर्मीले लिगको पहिलो खेलमा न्यू रोड टिम (एनआरटी) सँग २-२ को बराबरी खेलेको थियो । त्यसयता आर्मीले लगातार जित हासिल गर्दै आएको छ । लिगको ४ खेलमा आर्मीले १० अंक जोडेको छ । पछिल्लो दुई खेलमा आर्मीका लागि टेकबहादुर बुढाथोकीले उत्कृष्ट प्रदर्शन गरेका छन् । फरवार्ड नवयुग श्रेष्ठ चोटका कारण अनुपस्थित रहँदा टेकबहादुरले मिडफिल्डबाट नै गोल गर्दै टोलीलाई जित दिलाएका हुन् । शेर्पाविरुद्ध नवयुग खेल्ने सम्भावना रहेको छ ।

यता शेर्पाले पनि पहिलो खेलमा एपीएफविरुद्ध गोलरहित बराबरीमा रोकिएपछि लगातार जित दर्ता गर्दै आइरहेको छ । शेर्पाले पनि ४ खेलमा ३ जित र १ बराबरीसँगै १० अंक जोडेको छ । शेर्पाको जितमा फरवार्ड कर्ण लिम्बू नायक बन्दै आएका छन् । घरेलु फुटबलमा बेग्लै पहिचान बनाएका कर्णले पछिल्ला दुवै खेलमा गोल गरेका छन् । शेर्पाले आर्मीविरुद्ध पनि आफ्नो अपराजित यात्रालाई निरन्तरता दिने हो भने उनको भूमिका महत्त्वपूर्ण हुनेछ ।

यस खेलमा जित हात पार्ने टोलीले शीर्षस्थानमा रहेको मनाङसँगको अंक दुरी २ अंकमा छोट्याउने छ । खेल बराबरी भएको खण्डमा भने दुवै टोली ४ अंकले पछाडी रहनेछन् । यससँगै मनाङले पनि ३ अंकको अग्रता कायम राख्नेछ ।

एन्फा कम्प्लेक्समा हुने पहिलो खेलमा भने मछिन्द्र र फ्रेन्ड्स पहिलो जितको खोजीमा हुनेछन् । दुवै टोलीले हालसम्म लिगमा जित दर्ता गर्न सकेका छैनन् । फ्रेन्ड्सले पछिल्लो खेलमा जावलाखेलसँग ३-३ को बराबरी खेल्दै अंकको खाता खोलेको थियो भने मछिन्द्रले सुरुवाती दुई खेलमा गोलरहित बराबरी खेल्दै २ अंक जोडेको छ । दुवै टोली पहिलो जितको खोजीमा हुनेछन् ।

हल्चोक रंगशालामा हुने एकमात्र खेलमा ब्रिगेड ब्वाइज क्लबले जावलाखेल युवा क्लबविरुद्ध खेल्नेछ । जावलाखेल लिगको पहिलो जितको खोजीमा छ । पछिल्लो खेलमा फ्रेन्ड्सविरुद्ध ३-३ को बराबरीमा जावलाखेलले पहिलो अंक जोडेको थियो । यता ब्रिगेड ब्वाइज पनि एपीएफलाई पराजित गरेको ३ अंकमा नै सिमित छ । त्यसयता टोलीले कुनै अंक जोडेको छैन ।

आजको खेल :

मंसिर १६ : मछिन्द्र विरुद्ध फ्रेन्ड्स – ११:०० – एन्फा कम्प्लेक्स

मंसिर १६ : आर्मी विरुद्ध शेर्पा – २:३० – एन्फा कम्प्लेक्स

मंसिर १६ : ब्रिगेड ब्वाइज विरुद्ध जावलाखेल – २:३० – हल्चोक