एजेन्सी – रियल म्याड्रिडले स्पेनिस ला लिगा अन्तर्गत शनिबार भएको खेलमा भ्यालेन्सियालाई २-० ले पराजित गर्दै शीर्षस्थानसँग दुरी घटाएको छ ।

घरेलु मैदान सान्टियागो बर्नाबाउमा रियलले पहिलो गोल उपहार पायो । भ्यालेन्सियाका ड्यानीएल वासले आठौं मिनेटमा आत्मघाती गोल गरेपछि रियल अगाडी बढेको थियो । वासले ड्यानी कार्भाजलको क्रसलाई क्लियर गर्न खोज्दा उनको हेडर आफ्नै पोस्टमा छिरेको थियो । त्यसअघि ग्यारेथ बेलको प्रहारलाई गोलरक्षक लुइस नेटोले छेक्दा रिबाउन्डमा बेन्जेमाले गोल गर्ने अवसर चुकाएका थिए ।

रियलले खेलमा पकड जमाएपनि दोस्रो गोल थप्न निकै संघर्ष गर्नुपर्यो । खेलको ७ मिनेट समय बाँकी हुँदा रियलले लुकास भाज्केज्को गोलमा अग्रता दोब्बर पार्यो । एसेन्सियोले फिनिस गर्न नसकेको बललाई बेन्जेमाले भाज्केजलाई पास दिएपछि उनले गोलरक्षकलाई बिट गर्दै गोल गरेका थिए । त्यसअघि पनि ग्यारेथ बेलको स्थानमा मैदान आएका एसेन्सियोले गोल गर्न चुकेका थिए ।

पछिल्लो खेलमा एइबारविरुद्ध ३-० को हार बेहोरेपछि निकै दबाबमा रहेका म्याड्रिड प्रशिक्षक सान्टियागो सोलारीलाई यस जितले केहि राहत मिलेको छ । रियल १४ खेलमा २३ अंक जोड्दै अंक तालिकाको पाँचौ स्थानमा रहेको छ । यो सिजनको सातौं जित हो । शीर्ष स्थानमा सेभिल्लाले १३ खेलमा २६ अंक जोडेको छ ।

शनिबारको अन्य खेलमा रायो भालेकानोले एइबारलाई १-० ले हरायो । सेलता भिगोले हुएस्कालाई २-० तथा गेटाफेले एस्पान्योललाई ३-० ले पराजित गरे । रियल भालाडोलिड घरेलु मैदानमा लेगानेससँग ४-२ ले पराजित भयो ।