एजेन्सी – इंग्लिस प्रिमियर लिग अन्तर्गत शनिबार बर्नमाउथलाई ३-१ ले पराजित गर्दै म्यानचेस्टर सिटीले अपराजित यात्रा कायम राखेको छ । सिटीको जितमा बर्नार्डो सिल्भा, रहिम स्टरलिङ र इल्काए गुन्डोगनले १-१ गोल गरे ।

सिटीले बर्नार्डो सिल्भाको १६ औं मिनेटको गोलमा अग्रता लिएको थियो । लेरोय सानेको प्रहारलाई बर्नमाउथका गोलरक्षक आस्मीर बेगोभिचले विफल पारेपछि रिबाउन्डमा सिल्भाले गोल गरे । बर्नमाउथले पहिलो हाफको अन्तिम मिनेटमा बराबरी गोल फर्कायो । साइमन फ्रान्सिसको क्रसमा क्यलम विल्सनले ४४ औं मिनेटमा गोल गरे । विल्सनको शक्तिशाली हेडरलाई सिटीका गोलरक्षक एडरसनले हात लाएपनि विफल पार्न सकेनन् ।

दोस्रो हाफमा सिटीले आक्रमणमा थप जोड दियो । रहिम स्टरलिङले ५७ औं मिनेटमा गोल गर्दै सिटीको अग्रता पुन:स्थापना गरे । उनको बर्नमाउथविरुद्ध पछिलो ६ खेलमा आठौं गोल हो । खेल सकिनुभन्दा ११ मिनेट अगाडी जर्मन मिडफिल्डर गुन्डोगनले सिटीको जित पक्का गरे । उनले लेरोय सानेको पासमा गोल गरेका थिए ।

यस जितसँगै सिटीको १४ खेलमा १२ जित र २ बराबरसँगै ३८ अंक भएको छ । दोस्रो स्थानको लिभरपुलले १३ खेल खेल्दै ३३ अंक जोडेको छ । लिभरपुलले आइतबार एभरटनको सामना गर्दैछ ।

लिग अन्तर्गत नै शनिबार अन्य खेलमा वेस्ट ह्याम युनाइटेडले न्यूक्यासल युनाइटेडलाई ३–० ले पराजित गर्यो । क्रिस्टल प्यालेसले बर्नलीलाई २–० ले हराउँदा कार्डिफ सिटीले वल्भरह्याम्प्टन वन्डरर्सलाई २–१ ले पाखा लगायो । ब्राइटन एन्ड होभ आल्बियनले हडर्सफिल्ड टाउनलाई २–१ तथा लेस्टर सिटीले वाटफोर्डलाई २–० ले पराजित गरे ।