एजेन्सी – कप्तान मारको रिउस र पाको अल्कासेरले १-१ गोल गरेपछि जर्मन बुन्डेसलिगा अन्तर्गत शनिबार भएको खेलमा बोरुसिया डर्टमुन्डले फ्राईबर्गलाई २-० ले पराजित गरेको छ । यससँगै डर्टमुन्डले शीर्ष स्थानमा ७ अंकको अग्रता लिएको छ ।

घरेलु मैदान सिग्नाल इडुना पार्कमा डर्टमुन्डले कप्तान रिउसको गोलमा अग्रता लिएको थियो । ४० औं मिनेटमा जेडन सान्चोलाई पेनाल्टी क्षेत्रभित्र लडाएपछि प्राप्त पेनाल्टीमा रिउसले कुनै गल्ति गरेनन् । पछिल्लो समय निकै लयमा रहेमा सान्चोलाई डोमिनिक हाइन्ट्जले लडाएका थिए । त्यसअघि रिउस र मारियो गोट्जेले पाएको अवसरलाई सदुपयोग गर्न सकेका थिएनन् ।

दोस्रो हाफमा वैकल्पिक खेलाडीका रुपमा मैदान प्रवेश गरेका फरवार्ड पाको अल्कासेरले डर्टमुन्डको अग्रता दोब्बर पारे । इन्ज्युरी समयको पहिलो मिनेटमा सान्चो र लुकास पिस्जेकले बनाएको मुभमा अल्कासेरले जारी लिगको दशौँ गोल गरे । उनको यो डर्टमुन्डको जर्सीमा आठौं लिग खेल हो ।

डर्टमुन्डले १३ खेलमा १० जित र ३ बराबरसँगै अपराजित यात्रा कायम गर्दै ३३ अंक जोडेको छ । दोस्रो स्थानको बोरुसिया मोन्चेन्ग्लाडबाकले १२ खेलमा २६ अंक जोडेको छ । साविक विजेता बायर्न १३ खेलमा २४ अंक जोड्दै तेस्रो स्थानमा छ । बायर्नले शनिबारै वेर्डर ब्रेमनलाई २-१ ले परजित गर्यो ।