काठमाडौं (हाम्रो खेलकुद) – नेपाली राष्ट्रिय फुटबल टोलीका गोलरक्षक किरण चेम्जोङ सम्मिलित टिसी स्पोर्ट्स क्लबले माल्दिभ्सको शीर्ष डिभिजन लिग धिवेही प्रिमियर लिगको उपाधि जितेको छ । लिग उपाधिसँगै किरण प्रतियोगिताको सर्वोत्कृष्ट गोलरक्षक पनि चुनिए ।

किरणको टोलीले लिगको १६ खेलमा १३ जित, १ बराबर र २ हारसहित ४० अंक जोड्दै लिग उपाधिमाथि कब्जा जमाएको हो । अन्तिम चरणको खेलसम्म पनि दोस्रो स्थानको माजियाले टिसीलाई चुनौती दिएको थियो । अन्तिम चरणको खेलमा माजिया र न्यु रेडीयन्टले ४-४ को बराबरी खेलेपछि टिसी आफ्नो अन्तिम खेल अगाडी नै विजेता हुने पक्का भएको थियो । माजियाले १६ खेलमा ३८ अंक जोड्दा टिसीले ४० अंक जोड्दै उपाधि जित्यो ।

टिसी स्पोर्ट्सले अन्तिम खेलमा क्लब इगल्ससँग ४-४ को बराबरीमा रोकियो । यो लिगमा टिसीको पहिलो बराबरी थियो । लिगको अघिल्लो खेलमा माजियासँग ४-२ ले पराजित भएपछि टिसीको उपाधि दावेदारिता कमजोर भएको थियो । तर माजियाले न्यु रेडीयन्टलाई हराउन नसकेपछि टिसीले अन्तिम खेल अगावै उपाधिमा कब्जा गरेको हो ।

किरणको टोलीले लिग अवधिभर खेलेका १६ खेल मध्य ११ खेलमा क्लिन सिट राख्न सफल भएका थिए । उनले जम्मा ५ खेलमा मात्र गोल खाए । पराजित भएको दुई खेलमा माजियासँग ४-२ र गरिन स्ट्रिटसँग २-१ ले पराजित टोलीले अन्य खेलमा ५-१ र ६-१ को जित र ४-४ को बराबरीमा गोल खाएको हो । किरणले यसै प्रदर्शनलाई आधार मानेर सर्वोत्कृष्ट गोलरक्षकको उपाधि पनि हात पारे ।

किरणले गतवर्ष मिन्नरेभा पन्जाबबाट खेल्दै भारतको आई-लिग उपाधि पनि जितेका थिए । नेपालमा हुँदा रुस्लान थ्री स्टारबाट राष्ट्रिय लिग जितेपछि विदेश लागेका किरणले टिसी स्पोर्ट्सबाटै दुई वर्षअघि बंगलादेशमा सम्पन्न शेख कमल अन्तर्राष्ट्रिय फुटबल प्रतियोगिताको उपाधि पनि जितेका थिए । किरणले राष्ट्रिय टोलीलाई एएफसी सोलिडारिटी कप जिताउन पनि महत्त्वपूर्ण भूमिका निर्वाह गरेका थिए ।

सोलिडारिटी कपमा लाओसविरुद्ध ३ पेनाल्टी विफल पार्दै नेपाललाई फाइनल पुर्याएका किरणले लगातार सफलता हात पारिरहेका छन् । उनले यसै वर्ष सम्पन्न ओलम्पिक छनोटमा पनि जापानविरुद्ध उत्कृष्ट प्रदर्शन गरेका थिए । बंगलादेशमा सम्पन्न साफ च्याम्पियनसिपमा टोलीको कप्तानी समेत गरेका किरणको प्रदर्शन प्रभावशालि रहँदै आएको छ ।