एजेन्सी – स्पेनिस क्लब रियल म्याड्रिडले लामो समयदेखि डेनिस मिडफिल्डर क्रिस्टियन एरिक्सनलाई अनुबन्ध गर्ने प्रयास गरिरहको छ । पछिल्लो समय खराब प्रदर्शन गरिरहेको म्याड्रिडले एरिक्सनलाई आफ्नो खेलाडी सूचिको शीर्ष स्थानमा राखेको छ ।

ब्यालोन डी’ओर उपाधिका लागि सबैभन्दा बलियो दावेदारको रुपमा रियल म्याड्रिडका मिडफिल्डर लुका मोड्रीच रहेका छन् । तर विश्वकप पछि रियल म्याड्रिडका लागि भने मोड्रीचको प्रदर्शनमा एकरुपता आउन सकेको छैन । त्यसैले रियलले अर्को ट्रान्सफर विन्डोमा मोड्रीचको उत्तराधिकारीको खोजि थालिसकेको छ । उक्त भूमिकामा एरिक्सन ठिक हुने र एरिक्सन एक स्टार खेलाडी भएकाले पनि रियलको रोजाइमा उनी परेका हुन् ।

३३ वर्षीय मोड्रीच करिअरको अन्त्यतिर पनि पुगेको संकेत क्लबले पाउन थालिसकेको छ । यस्तो अवस्थामा रियलले टोलीमा व्यापक परिवर्तन गर्ने आवश्यकता छ । मोड्रीचले यस पटक ब्यलोन डी ओर उपाधि जित्दै मेसी र रोनाल्डोले पछिल्लो एक दशकदेखि कायम गरेको वर्चस्व तोड्ने अनुमान पनि गरिएको छ । उनलाई फ्रान्सका एन्टोइन ग्रिज्मन, किलियन एमबाप्पे र राफेल भारानले कडा प्रतिस्पर्धा दिने सम्भावना छ ।

मोड्रीच पनि टोटेनहम हट्सपरबाट ३५ मिलियन युरोमा म्याड्रिड आएका थिए । त्यसपछि रियलले त्यसै क्लबबाट ग्यारेथ बेललाई पनि भित्र्यायो । त्यसबेला रियल र टोटेनहमले दुवै क्लबले एक अर्कालाई सहयोग गर्ने भन्दै सहमति पनि गरेका थिए, तर रियलले एकतर्फी फाइदा लिएको भन्दै पछि तोडियो । एरिक्सनलाई रियलले खरिद गर्नुपार्दा २ सय ५० मिलियन युरो तिर्नुपर्ने टोटेनहमका अध्यक्ष ड्यानीएल लेभीले बताएका छन् ।

एरिक्सनको सन् २०२० सम्म टोटेनहममा सम्झौता रहेको छ । उनले अहिले नै नयाँ सम्झौता नगरे अर्को सिजन अन्तिम सिजन हुनेछ । यस्तो अवस्थामा उनले क्लब छोड्ने इच्छा देखाए टोटेनहमले सस्तोमा नै उनलाई बेच्नुपर्ने अवस्था आउन सक्छ ।