एजेन्सी – यूईएफए च्याम्पियन्स लिग अन्तर्गत बुधबार एटलेटिको म्याड्रिडले एएस मोनाकोलाई पराजित गर्दै अन्तिम १६ मा स्थान पक्का गरेको छ । घरेलु मैदानमा एटलेटिको २-० ले विजयी रहयो ।

एटलेटिकोले खेलको पहिलो हाफमा गरेको २ गोल नै जितको लागि पर्याप्त रहयो । घाइते रहेका डिएगो गोडीनको अनुपस्थितिमा कप्तानी गरिरहेका कोकेले दोस्रो मिनेटमा नै एटलेटिकोलाई अग्रता दिलाएका थिए । उनले पेनाल्टी क्षेत्र बाहिरबाट गरेको प्रहार डिफेन्डरलाई लाग्दै गोलमा परिणत भएको थियो ।

फरवार्ड एन्टोइन ग्रिज्मनले २४ औं मिनेटमा अग्रता दोब्बर पारे । उनले पेनाल्टी क्षेत्रभित्र उत्कृष्ट फिनिस गर्दै एटलेटिकोलाई बलियो स्थितिमा पुर्याएका थिए । मोनाकोले खेलमा दबाब बनाउन नसकेपनि अन्तिम समयमा पेनाल्टी अवसर पाएको थियो । एटलेटिकोका पूर्व खेलाडीसमेत रहेका फरवार्ड राडामेल फाल्काओले उक्त पेनाल्टीमा गोल गर्न भने सकेनन् ।

समूहको अर्को खेलमा बोरुसिया डर्टमुन्ड बेल्जियमको क्लब ब्रुजसँग गोलरहित बराबरीमा रोकियो । यस नतिजाले जर्मन क्लब अर्को चरणमा प्रवेश गरेको छ । अब समूह विजेताको टुङ्गो भने अन्तिम खेलपछि मात्र लाग्नेछ । एटलेटिकोले ५ खेलमा १२ अंक जोडको छ भने डर्टमुन्डले १० अंक जोडेको छ । अन्तिम खेलमा मोनाकोले डर्टमुन्ड र एटलेटिकोले ब्रुजसँग खेल्नेछन् ।