इन्टर मिलानमाथि टोटेनहमको संघर्षपूर्ण जित

वेम्वली (एजेन्सी) – वैकल्पिक खेलाडी क्रिस्टियन इरिक्सनको गोल मद्दतमा इंग्लिस क्लब टोटेनहमले इन्टर मिलानमाथि १–० को संघर्षपुर्ण जित निकालेको छ ।

घरेलु मैदानमा बुधबार राति भएको खेलमा बराबरीतर्फ धकेलिएको खेलमा इरिक्सनले ८८औं मिनेटमा गोल गर्दै टोटेनहमलाई जित दिलाए । इरिक्सन ७०औं मिनेटमा इरिक लमेलाको स्थानमा मैदान प्रवेश गरेका थिए । निकै नै प्रतिस्पर्धात्मक बनेको खेलमा दुवै टोलीले गोलको केही सुन्दर मौका खेर फालेको थिए ।

यो जितसँगै टोटेनहमले च्याम्पियन्स लिगको नकआउट चरण पुग्ने सम्भावना बलियो बनाएको छ । अब टोटेनहमले समूह चरणको अन्तिम खेलमा स्पेनिस क्लब बार्सिलोनासँग खेल्दैछ । सोही दिन इन्टर मिलान र पीएसभीबीच खेल हुनेछ ।

यो समूहबाट बार्सिलोनाले नकआउट चरणमा स्थान बनाइसकेको छ । बार्सिलोनाको ५ खेलबाट १३ अंक छ । टोटेनहम र इन्टर मिलानको समान ७ अंक छ । गोलअन्तरमा टोटेनहम अघि छ । १ अंक रहेको पीएसभी समूह चरणबाटै बाहिरिएको छ । अब बार्सिलोनाविरुद्ध खेलमा जित हात पारे टोटेनहम अघिल्लो चरण प्रवेश गर्नेछ । बराबरी वा पराजित भएको अवस्थामा इन्टर मिलान र पीएसभीको खेलको नतिजा कुर्नुपर्ने हुन्छ ।