एजेन्सी – रियलका प्रशिक्षक प्रशिक्षक सान्टियागो सोलारीले च्याम्पियन्स लिगमा गएराती रोमाविरुद्ध आश्चर्यजनक निर्णय लिए । उनले युवा मार्कोस लोरेन्टेलाई सुरुवाती रोजाइमा खेलाउने जोखिम लिए ।

ब्राजिलियन मिडफिल्डर क्यासेमिरो घाइते भएपछि प्रशिक्षक सोलारी दबाबमा थिए । उनले २३ वर्षीय लोरेन्टेलाई सुरुवाती रोजाइमा उतार्दै जारी सिजनको तेस्रो मौका दिए । यसअघि लोरेन्टेले मेलिलाविरुद्ध कोपा डेल रेमा खेलेका थिए भने लिगअन्तर्गत एस्पान्योलविरुद्ध भने ११ मिनेट मात्र मैदानमा बिताएका थिए । यसका बाबजुद पनि खेल अवधिभर लोरेन्टेले राम्रो प्रदर्शन गरे ।

लोरेन्टे खेलमा मौका नपाउँदा पनि आफुलाई हरदम तयार राखेको प्रष्ट हुन्थ्यो । उनले मौकाको सदुपयोग गर्दै आफ्नो खेल जीवन नै परिवर्तन हुने प्रदर्शन रोमाविरुद्ध गरे । ट्रान्सफर विन्डोमा स्पेनका अन्य क्लबले उनलाई आफ्नो प्रमुख रोजाइमा राखेका थिए । तर यस प्रदर्शनले रियललाई उनलाई क्लबमा नै राख्न बाध्य बनाएको छ ।

खेलमा लोरेन्टेले ९१.१ प्रतिशत पासलाई सफलतापूर्वक आफ्नो सहकर्मीसम्म पुर्याएका थिए । जुन मोड्रीचले गरेको प्रदर्शनभन्दा पनि उत्कृष्ट रहयो । उनको प्रदर्शनलाई लिएर गोलकर्ता लुकास भाज्केज पनि निकै खुसी देखिए । ‘ लोरेन्टेले साच्चै नै राम्रो प्रदर्शन गरे । यो खेल हाम्रो लागि सहज थिएन । उनले आफ्नो क्षमतालाई खेलमा देखाएर राम्रो संकेत दिएका छन्,’उनले भने ।

भाज्केजले रोमाविरुद्धको खेल रियलको लागि समग्रमा निकै महत्त्वपूर्ण रहेको बताए । ‘रोमाले निकै कडा चुनौती दियो । खेल निकै प्रतिस्पर्धात्मक थियो र हाम्रो पहिलो गोल नै खेलको टर्नीङ पोइन्ट बन्यो,’ उनले थपे, ‘एइबारविरुद्ध पराजयपछि हामीले जित हासिल गर्नु जरुरि थियो । हामीले आक्रमण र डिफेन्समा नै राम्रो प्रदर्शन गर्न सक्यौं ।’