लियोन (एजेन्सी) – इंग्लिस क्लब म्यानचेस्टर सिटी र फ्रेन्च लिग वान क्लब लियोन युइएफए च्याम्पियन्स फुटबलको प्रि–क्वाटरफाइनलमा प्रवेश गरेको छ ।

सिटी समूह ‘एफ’ को विजेता तथा लियोन उपविजेता बन्दै नकआउट चरणका पुग्न सफल भएको हो । सिटीले समूह चरणको ५ खेलबाट ३ जित समान १ बराबरी र हारबाट १० अंक जोड्यो । लियोनले समान ५ खेलबाटै ७ अंक जोड्यो ।

च्याम्पियन्स लिग अन्तर्गत मंगलबार राति भएको खेलमा सिटी र लियोनले २–२ गोलको बराबरी खेल्यो । घरेलु टोलीका लागि दुवै गोल म्याक्सवेल कर्नटले गरेका थिए । सिटीका एमरिक लापोर्टे र सर्जियो अग्विरोले गोल फर्काए । प्रतिस्पर्धात्मक बनेको खेलको पहिलो हाफ गोलरहित बराबरीमा सकिएको थियो ।

५५औं मिनेटमा म्याक्सवेल कर्नटले गोल गर्दै घरेलु टोलीलाई अग्रता दिलाएका थिए । तर, त्यो अग्रता लामो समय टिकेन । सिटीका लापोर्टेले ६२औं मिनेटमा बराबरी गोल फर्काएका थिए । ८१औं मिनेटमा मेम्फिस डिपेको पासमा म्याक्सवेलले दोस्रो गोल गरेपछि पुन घरेलु टोलीले २–१ को अग्रता लियो । तर, त्यसको २ मिनेटपछि नै सिटीका अगुएरोले रियाद महारेजको पासमा बराबरी गोल फर्काए । त्यसपछि थप गोल निस्कन नसक्दा खेल बराबरीमा सकियो ।

यही समूहको अर्काे खेलमा युक्रेनी क्लब साख्तर डोनेस्कले १० खेलाडीमा समेटिएको टीएसजी होफेनहेमलाई ३–२ ले पराजित गरेपनि नकआउट चरणका पुग्न सकेन । साख्तरको जितमा टाइसनले २ तथा इस्माइलीले एक गोल गरे । टीएसजीका एन्डरेज क्रामारिक र स्टेभन जुवेरले गोल गरे ।