काठमाडौं (हाम्रो खेलकुद) – पल्सर सहिद स्मारक ए डिभिजन लिग अन्तर्गत मनाङ मर्स्याङदी क्लबले नेपाल एपीएफ क्लबलाई २-१ ले पराजित गरेको छ । यस जितसँगै मनाङ अंक तालिकाको शीर्ष स्थानमा उक्लियो ।

खेलको आठौं मिनेटमा विशाल राईले झन्डै ३५ यार्ड टाढाबाट प्रहार गरेको फ्रिकिकमा फार पोस्टमा अनमार्क रहेका अन्जन विष्टको हेडरले पोस्टको दिशा लिन सकेन । १९ औं मिनेटमा मनाङले सुरुवाती अग्रता बनायो । आडेलाजा सोमिडेले विमल रानामगरसँग पेनाल्टी क्षेत्रबाहिर वन टु पास खेल्दै सुन्दर गोल गरे । उनको शक्तिशाली प्रहारलाई गोलरक्षक राजु योगीले सिधै आएपनि बचाउन सकेनन् ।

एपीएफले २५ औं मिनेटमा गोल गर्ने सुन्दर अवसर गुमायो । नवीन लामाले बायाँ विङबाट आउटसाइड फुटले दिएको लो क्रसमा युवराज खड्काले ६ यार्ड बक्स नजिकबाट गरेको प्रहार अकासियो । त्यसको दुई मिनेटमै एपीएफले पेनाल्टी पायो । नवीन लामाको फ्रिकिक प्रहार पेनाल्टी क्षेत्रभित्र डिफेन्डर मोहमद आसिफको हातमा लागेपछि रेफ्रीले पेनाल्टी दिएका थिए । नवीनले उक्त पेनाल्टीलाई गोलमा परिणत गर्दै खेल बराबरीमा ल्याए ।

खेलको ४५ औं मिनेटमा मनाङले पनि पेनाल्टी पायो । कमल श्रेष्ठको क्रस सन्तोष कटवालको हातमा लागेपछि प्राप्त पेनाल्टीमा अन्जन विष्टले गोल गरे । पहिलो हाफमा मनाङले १-० को अग्रता लिएको थियो ।

दोस्रो हाफको सुरुवातमै एपीएफले बराबरी गर्ने मौका गुमायो । ५० औं मिनेटमा श्याम नेपालीको क्रसमा राजन गुरुङको हेडर पोस्टभन्दा थोरै माथिबाट बाहिरियो । ८२ औं मिनेटमा डोना थापाको क्रसमा आडिलेजे सोमिडेले हेडरलाई पोस्टको दिशा दिन सकेनन् । इन्ज्युरी समयको पहिलो मिनेटमा डोना थापाको प्रहारलाई दोस्रो हाफमा मैदान छिरेका गोलरक्षक अमृत चौधरीले सुन्दर बचाउ गरे ।

यस जितसँगै मनाङले लिगमा शत प्रतिशत जितको रेकर्डलाई कायम राखेको छ । मनाङ ४ खेलमा १२ अंकसहित शीर्ष स्थानमा २ अंकको अग्रता कायम गर्न सफल भएको छ । दोस्रो स्थानको आर्मीले ४ खेलमा १० अंक जोडेको छ । तेस्रो स्थानको रुस्लान थ्री स्टारको ९ अंक छ । एपीएफ भने ४ खेलमा ४ अंक जोड्दै लिग तालिकाको नवौं स्थानमा छ ।