काठमाडौं (हाम्रो खेलकुद) – पल्सर सहिद स्मारक ए डिभिजन लिगको चौथो चरणअन्तर्गत मंगलबार सातदोबाटोस्थित एन्फा कम्प्लेक्समा दुई खेल हुँदैछन् । पहिलो खेलमा सरस्वती युवा क्लब र ब्रिगेड ब्वाइज क्लब भिड्नेछन् भने दोस्रोमा नेपाल एपीएफ क्लबले मनाङ मर्स्याङदी क्लबको सामना गर्नेछ ।

सोमबार भएको खेलमा त्रिभुवन आर्मी क्लबले सीएमजी क्लब संकटालाई ५-१ को फराकिलो अन्तरले पराजित गर्दै शीर्ष स्थानमा कब्जा जमायो । मनाङ अब एपीएफलाई हराउँदै उक्त स्थानमा फर्कने लक्ष्यमा हुनेछ । रुस्लान थ्री स्टारविरुद्ध अनुपस्थित रहेका फरवार्ड ओलावाले आफिज र डिफेन्डर कमल श्रेष्ठ यस खेलमा उपस्थित हुनेछन् । लिगको सुरुवाती तीनै खेल जितेको मनाङ शत प्रतिशत जितको रेकर्ड कायम राख्ने लक्ष्यमा हुनेछ ।

एपीएफ पनि पछिल्लो खेलमा भोगेको पराजयलाई बिर्सने प्रयासमा हुनेछ । ब्रिगेड ब्वाइजविरुद्ध अग्रता लिएपनि एपीएफ ३-१ ले पराजित भएको थियो । उक्त खेलमा रातो कार्ड पाएका विश्वास उदास यस खेलमा उपस्थित हुने छैनन् । आक्रमणमा निकै कमजोर देखिएको एपीएफले मनाङविरुद्ध नतिजा ल्याउन निकै मिहिनेत गर्नुपर्ने हुन्छ । डिफेन्डर आदित्य चौधरीको अनुपस्थितिले पनि डिफेन्समा केहि असर परेको छ ।

यता तेस्रो चरणमा लिगको पहिलो जित दर्ता गरेका सरस्वती र ब्रिगेड ब्वाइज सोहि लयलाई कायम राख्ने लक्ष्यमा हुनेछन् । विदेशी खेलाडीको आगमनले दुवै टोली मजबुत भएका छन् । तीनै खेलाडीमा भर गरेर नै अघिल्लो खेलमा जित दर्ता गरेका थिए । लिगको पुछारमा नबस्न यस खेलको नतिजा महत्त्वपूर्ण हुनेछ ।