बोर्नमाउथ (एजेन्सी) – इंग्लिस प्रिमियर लिग फुटबलमा आर्सनलले बोर्नमाउथलाई पराजित गरेको छ । लिग अन्तरगत आइतबार राति भएको खेलमा आर्सनलले बोर्नमाउथलाई २–१ ले पराजित गरेको हो ।

बोर्नमाउथमा भएको खेलमा आर्सनलले खेलको ३०औं मिनेटमा आत्मघाती गोलबाट खेलमा अग्रता बनाएको थियो । सिड कोलासिनाकको प्रहार बचाउने क्रममा जेफर्सन लेर्माले आफ्नै पोस्टमा गोल गर्न पुगेका थिए ।

पहिलो हाफको इन्जुरी समयको थप गरिएको पहिलो मिनेटमा जोसुवा किङले गोल गरेपछि पहिलो हाफ १–१ गोलको बराबरीमा सकिएको थियो । जोसुवाले डेभिड ब्रोक्सको पासलाई सदुपयोग गरेका थिए ।

६७औं मिनेटमा पिएर इम्रिक औवामियाङले गोल गर्दै आर्सनललाई २–१ को अग्रता दिलाए । उनले कोलासिनाककै पासलाई गोलमा परिणत गरेका थिए । खेलभर नै घरेलु टोलीलाई दवावमा राखेपनि आर्सनलले थप गोल गर्न सकेन ।

जितपछि आर्सनल लिगको चौथो स्थानमा उक्लिएको छ । आर्सनलको १३ खेलबाट २७ अंक पुगेको छ । पराजित बोर्नमाउथ २० अंकसहित आठौं स्थानमा छ । ३५अंकसहित म्यानचेस्टर सिटी लिगको शीर्ष स्थानमा रहेको छ ।

आइतबार राति नै भएको अर्काे खेलमा हडर्सफिल्डले वल्भ्सलाई २–० ले पराजित गरेको छ । हडर्सफिडको जितमा दुवै गोल आरोन मोयले गरे ।
जितपछि हडर्सफिल्ड १० अंक जोडेर १४औं स्थानमा उक्लदा वल्भ्स १६ अंकसहित ११औं स्थानमा छ ।