एजेन्सी – रियल भालाडोलिडलाई पराजित गर्दै सेभिल्ला स्पेनिस ला लिगाको शीर्ष स्थानमा उक्लिएको छ । आइतबार घरेलु मैदान स्टाडीयो रामोन सान्चेज पिजुआनमा भएको खेलमा सेभिल्ला १-० ले विजयी रहयो ।

खेलको ३० औं मिनेटमा पाब्लो सराबियाको क्रसमा आन्द्रे सिल्भाले हेडर मार्फत गोल गर्दै सेभिल्लालाई अग्रता दिलाएका थिए । खेलको सुरुवाती समयदेखि नै दबाब बनाएको सेभिल्लाले थप गोल गर्न भने सकेन । खेलको अन्तिम समयमा गोलरक्षक थोमा वाक्लिकले उत्कृष्ट बचाउ गर्दै सेभिल्लाको ३ अंक जोगाएका थिए ।

शनिबार एटलेटिको म्याड्रिडको घरेलु मैदानमा बार्सिलोना र एटलेटिकोको खेल १-१ को बराबरीमा टुंगिएपछि सेभिल्लालाई शीर्षस्थानमा जाने अवसर जुरेको थियो । सिल्भाको निर्णायक गोलमा सेभिल्लाले उक्त अवसरको सदुपयोग गर्दै शीर्षस्थानमा उक्लिएको हो । हालसम्म एकपटक मात्र लिग उपाधि जितेको सेभिल्ला डिसेम्बर महिनाको सुरुवातसम्म लिगको शीर्षस्थानमा रहनेछ । सेभिल्लाले सन् १९४५-४६ सिजनमा लिग उपाधि जितेको थियो ।

लिग तालिकामा सेभिल्ला १३ खेलमा २६ अंक सहित शीर्ष स्थानमा छ भने दोस्रो स्थानको बार्सिलोनाले २५ अंक जोडेको छ । २४ अंकसहित एटलेटिको म्याड्रिड तेस्रो तथा २३ अक जोडेको अलाभेस चौथो स्थानमा छ । एस्पान्योल (२१) पाँचौ स्थानमा छ भने छैटौं र सातौं स्थानका रियल म्याड्रिड र जिरोनाको समान २० अंक छ ।

सेभिल्लाले अब बिहीबार हुने यूईएफए युरोपा लिगको खेलमा बेल्जीयन क्लब स्टान्डर्ड लिएज सामना गर्नेछ । त्यसपछि लिग अन्तर्गत नै आइतबार सेभिल्लाको भिडन्त आलाभेससँग हुनेछ । आलाभेसले शुक्रबार लेगानेससँग १-० ले पराजित भएपछि अंक तालिकाको शीर्ष स्थानमा जाने मौका गुमाएको थियो ।