काठमाडौं (हाम्रो खेलकुद) – लिगको शीर्ष स्थानमा उक्लने लक्ष्यसहित पल्सर सहिद स्मारक ए डिभिजन लिग अन्तर्गत सोमबार पहिलो खेलमा त्रिभुवन आर्मी क्लब र सीएमजी क्लब संकटा भिड्दैछन् । खेल एन्फा कम्प्लेक्समा दिउँसो ११ बजे सुरु हुनेछ ।

लिगको सुरुवाती तीनै खेलमा जित दर्ता गरेको संकटा आफ्नो लयलाई निरन्तरता दिने सुरमा हुनेछ । टोलीमा रातो कार्ड पाएर पछिल्लो खेल गुमाएका फरवार्ड एलोन म्याक्सवेल पनि उपलब्ध हुनेछन् । यता आर्मीका लागि पनि पछिल्लो खेलमा चोटका कारण विश्राम लिएका फरवार्ड नवयुग श्रेष्ठ यस खेलमा पनि उपलब्ध रहने छैनन् । डिफेन्डर सुमन अर्याल पनि दोहोरो पहेंलो कार्डका कारण उपस्थित रहने छैनन् । यस खेलमा जित दर्ता गर्ने टोली अंक तालिकाको शीर्ष स्थानमा उक्लनेछ ।

संकटा प्रशिक्षक सल्यान खड्गीले लिगमा राम्रो सुरुवात पाएपनि त्यसलाई निरन्तरता दिन ठूलो चुनौती रहने बताएका छन् । ‘हामीले लिगको सुरुवातमा शीर्ष ५ मा आउने लक्ष्य राखेका थियौं । फरवार्डले औसत प्रदर्शन गर्दा पनि लगातार तीन जित हासिल गरेका छौं । आर्मी बलियो टोली हो । बेन्चमा अनि उत्तिकै राम्रा खेलाडी छन् । हामीले नतिजा प्राप्त गर्न निकै मिहिनेत गर्नुपर्ने हुन्छ,’ उनले भने ।

यता आर्मीका प्रशिक्षक नवीन न्यौपाने भने संकटालाई कमजोर नआँक्ने पक्षमा छन् । ‘संकटा राम्रो टोली हो । लगातर तीन जितले टोली उच्च मनोबलमा छ । हामीले सुरुवाती रोजाईका तीन खेलाडी गुमाएका छौं । यो हाम्रो लागि लय समात्ने अवसर पनि हो । खेलाडीहरुले यसको उपयोग गर्ने आशा राखेको छु,’ न्यौपानेले भने ।