नेयमार र एमबाप्पे नहुँदा पीएसजीको साँघुरो जित

पेरिस (एजेन्सी) – मुख्य खेलाडीद्धय नेयमार जुनियर र केलियन एमबाप्पे विनै मैदान उत्रिएको पेरिस सेन्ट जर्मेन (पीएसजी) ले फ्रेन्च लिग वान फुटबलमा साँघुरो जित दर्ता गरेको छ ।

पीएसजीले शनिबार राती घरेलु मैदानमा टुलुजलाई १–० ले पराजित गरेको हो । खेलको नवौं मिनेटमा एडिन्सन काभनीले गरेको गोल नै पीएसजीको जितमा निर्णायक बन्यो । यससँगै पीएसजीले फ्रेन्च लिग वानमा आफ्नो अपराजित यात्रालाई १४ औं खेलसम्म कायमै राखेका छ ।

यस जितसँगै पिएसजीले १४ खेलमा शत प्रतिशत जित निकाल्दै ४२ अंक जोडेको छ । पीएसजी दोस्रो स्थानको लियोन भन्दा १५ अंकले अघि छ । पराजित टुलुज १४ अंक जोडेर १५औं स्थानमा छ ।

अन्तर्राष्ट्रिय मैत्रीपूर्ण खेल दौरान चोट बोकेपछि नेयमार र एमबाप्पेले टोलुसोविरुद्धको खेल गुमाएका थिए । नेयमार र एमबाप्पेले बुधबार राति लिभरपुलविरुद्धको च्याम्पियन्स लिग खेलमा मैदानमा उत्रने सम्भावना छ ।

फ्रेन्च लिग वानमा मोनाकोले काइनलाई १–० ले पराजित गर्यो । मोनाकोको जितमा कप्तान राडामेल फल्काओले निर्णायक गोल गरे । जितपछि मोनाको १० अंक जोडेर १९औं स्थानमा उक्लिएको छ ।