वेम्वली (एजेन्सी) – इंग्लिस प्रिमियर लिग फुटबलमा टोटेनह्यामले चेल्सीलाई पराजित गरेको छ । लिग अन्तर्गत शनिबार राति भएको खेलमा टोटेनह्यामले चेल्सीलाई ३–१ ले पराजित गरेको हो ।

टोटेनह्यामलाई जिताउन डेल अली, ह्यारी केन र ह्युङ मिन सनले गोल गरे । चेल्सीका ओलिभर जिरुले सान्तवना गोल फर्काए । टोटेनह्यामको घरेलु मैदान वेम्वली स्टेडियममा भएको खेलमा घरेलु टोलीले खेलको आठौं मिनेटमा डेल अलीको गोलबाट अग्रता बनाएको थियो । उनले क्रिस्टियन इरिक्सनको पासलाई सदुपयोग गरेका थिए ।

१६औं मिनेटमा ह्यारी केनले क्रिस्टियन इरिक्सनकै पासमा गोल गरेपछि टोटेनह्यामले २–० को अग्रता बनायो ।

पहिलो हाफमा २–० ले अग्रता बनाएको टोटेनह्यामले दोस्रो हाफमा थप एक गोल गर्दा एक गोल खान पुग्यो । ५४औं मिनेटमा ह्युङ मिन सनले उत्कृष्ट गोल गरेपछि टोटेनह्याम खेलमा ३–० ले अघि बढेको थियो । उनले डेल अलीको पासलाई सदुपयोग गर्दै एकल प्रयासमा गोल गरेका थिए । ८५औं मिनेटमा ओलिभर जिरुले गोल गर्दै खेलमा फर्कने संकेत दिएपनि त्यो गोल सान्त्वना बन्यो ।

जितपछि टोटेनह्याम १३ खेलबाट ३० अंक जोड्दै तेस्रो स्थानमा उक्लिएको छ । प्रिमियर लिगमा पहिलो हार बेहारेको चेल्सी २८ अंकसहित चौथो स्थानमा झरेको छ ।