एजेन्सी – इटालियन सिरी ए अन्तर्गत शनिबार भएको खेलमा शीर्ष स्थानको युभेन्ट्सले अपराजित यात्रालाई कायम राख्दै एसपीएएललाई २-० ले पराजित गरेको छ । युभेन्ट्सको जितमा क्रिस्टियानो रोनाल्डो र मारियो मान्जुकीचले १-१ गोल गरे ।

खेलको २८ औं मिनेटमा क्रिस्टियानो रोनाल्डोले युभेन्ट्सलाई अग्रता दिलाएका थिए । उनले मिरालेम प्यानिचको फ्रिकिकलाई सदुपयोग गर्दै ६ यार्ड बक्स नजिकबाट सहजे गोल गरेका थिए । युभेन्ट्सले पोसेसनमा पकड बनाएपनि पहिलो हाफमा थप गोल गर्न भने सकेन ।

दोस्रो हाफको ६० औं मिनेटमा टोलीको कप्तानी सम्हालिरहेका मान्जुकीचले अग्रता दोब्बर पारे । रोनाल्डोले दिएको पासमा डग्लस कोस्टाको प्रहारलाई गोलरक्षक गोमिसले बचाउन नसक्दा फर्केर आएको बलमा उनले गोल गरेका थिए । ८१ औं मिनेटमा रोनाल्डोको प्रहर पोस्टभन्दा थोरै बाहिर गएको थियो । रोनाल्डोले जुआन क्वाडराडोको पासलाई उत्कृष्ट ढंगले नियन्त्रणमा लिएपनि प्रहार भने पोस्टको दिशामा जान सकेन ।

यस नतिजासँगै युभेन्ट्सको १३ खेलमा १२ जित र १ बराबरीसँगै ३७ अंक भएको छ । युभेन्ट्सले लिगको प्रत्यक खेलमा गोल गर्ने रेकर्डलाई कायम नै राखेको छ । दोस्रो स्थानमा रहेको नेपोलीको १२ खेलमा २८ अंक छ । नेपोलीले आइतबार किएभो भेरोनाको सामना गर्दैछ ।