काठमाडौं (हाम्रो खेलकुद) – कर्ण लिम्बुको दुई गोल मद्दतमा हिमालयन शेर्पा क्लबले ग्रान्डमास्टर जावलाखेल युथ क्लबलाई २–१ ले पराजित गरेको छ ।

हल्चोकस्थित एपिएफ क्लबको खेल मैदानमा शनिबार भएको खेलमा कर्णले दुवै गोल दोस्रो हाफमा गरेका थिए । जावलाखेलले एकमात्र गोल उपहारस्वरुप पायो । खेलमा शेर्पाका आशिष गुरुङले आत्मघाती गोल गरे । जितसँगै अपराजित रहेको शेर्पाले ३ खेलबाट ७ अंक जोडेर चौथो स्थानमा उक्लन सफल भएको ।

निराशजनक बनेको पहिलो हाफमा शेर्पाले केही मौका पाएपनि गोल गर्न सकेको थिएन । खेलको पहिलो मिनेटमा नै शेर्पाले अग्रता लिने सुन्दर मौका खेर फालेको थियो । प्याट्रिकले अफसाइड विट ट्याप गरेपनि राम्रोसँग बललाई नियन्त्रणमा लिन नसक्दा बक्स भित्रैबाट गरेको प्रहार पोस्टबाट थोरै बाहिरियो । १८औं मिनेटमा विश्वास श्रेष्ठको फ्रिकिक क्रसबारबाट थोरै बाहिर गयो ।

२६औं मिनेटमा भिषण गुरुङले पेनाल्टी एरियामा पाएको बललाई सदुपयोग गर्न सकेनन् । उनको प्रहार आकासिएको थियो । ३६औं मिनेट भिषणले अर्काे मौका खेर फाले । जावलाखेलले उल्लेख्य आक्रमण बुन्न सकेन । ४३औं मिनेटमा फोफानाको पासमा सुशिल कुमार यादवले मौका पाएपनि शेर्पाका डिफेन्डर आशिष गुरुङले क्लियर गरिदिएका थिए ।

दोस्रो हाफको ६६औं मिनेटमा पेनाल्टी बक्समा विश्वासले प्रहार गरेको प्रहारलाई गोलरक्षक टेकेन्द्र थापाले बचाएपनि रिवाउन्डमा कर्णले सुन्दर गोल गर्दै शेर्पालाई खेलमा अग्रता दिलाएका थिए । ७५औं मिनेटमा विश्वासकै कर्नरमा कर्णले गोल गर्दै शेर्पालाई २–० को स्थितिमा ल्याएका थिए । ८५औं मिनेटमा गोलरक्षक किशोर गिरी र आशिष गुरुङबीच तालमेल नमिल्दा आत्मघाती गोल हुन पुगेको थियो ।

इन्जुरी समयको थप गरिएको पहिलो मिनेटमा त्रिदेव गुरुङको प्रहार क्रसबारमा लागेर फर्कियो । लगत्तै फोफाना फोडेले सुन्दर मौका खेर फाल्दा २–१ ले पराजित हुन पुग्यो ।

यस नतिजासँगै शेर्पा अंक तालिकाको चौथो स्थानमा उक्लेको छ । शेर्पाले थ्री स्टारलाई उछिनेको हो । जावलाखेल भने अंकविहिन रहँदै पुछारमा रहेको छ ।