एजेन्सी – स्पेनिस ला लिगा अन्तर्गत शनिबार एटलेटिको म्याड्रिड र बार्सिलोना आमनेसामने हुँदैछन् । म्याड्रिडमा हुने खेलमा एटलेटिको बार्सिलोना विरुद्ध जितविहिन यात्रालाई तोड्ने सुरमा हुनेछ ।

एटलेटिकोले लिगको पछिल्लो १६ खेलमा बार्सिलोनालाई हराउन सकेको छैन । यसअघि सन् २०१० फेब्रुअरीमा एटलेटिको विजयी रहेको थियो । एटलेटिकोले लिगअन्तर्गत घरेलु मैदानमा खेलेका पछिल्लो १६ मध्ये १२ खेलमा जित दर्ता गरेको छ । तर कप्तान डिएगो गोडीनको अनुपस्थितिले टोलीलाई केहि कठिन पक्कै हुनेछ । उनको स्थानमा स्टेफान साभिच टोलीमा आउनेछन् ।

बार्सिलोनाका मिडफिल्डर फिलिपे कोउटिन्हो यसै साता प्रशिक्षणमा फर्किएका छन् । इन्टर मिलानविरुद्ध च्याम्पियन्स लिगमा चोट बोकेपछि उनी मैदानबाहिर रहँदै आएका थिए । तर उनलाई टोलीमा भने समेटिएको छैन । पछिल्लो खेलमा रातो कार्ड पाएपछि मिडफिल्डर इभान राकीटिच यस खेलका लागि उपलब्ध छैनन् । उनको स्थानमा आर्टुरो भिडालले सुरुवाती रोजाइमा खेल्ने सम्भावना रहेको छ ।

अंक तालिकामा बार्सिलोना एटलेटिकोभन्दा १ अंक अगाडी छ । यो खेल जित्ने टोलीले शीर्ष स्थानमा अग्रता बनाउनेछ । दुवै टोलीले पछिल्लो समय कमजोर टोलीविरुद्ध अंक गुमाएका छन् । लिगमा औसत सुरुवात पाएका दुवै टोली अन्तर्राष्ट्रिय ब्रेकपछि सुखद नतिजा अँगाल्न चाहन्छन् ।

प्रतियोगिता : स्पेनिस ला लिगा

खेल : एटलेटिको म्याड्रिड विरुद्ध बार्सिलोना

मैदान : स्ताडियो वान्डा मेट्रोपोलीटानो, म्याड्रिड

नेपाली समय : आइतबार विहान १:३० बजे (शनिबार मध्यरात)

लाइभ : ला लिगाको फेसबुक लाइभ