एजेन्सी (लन्डन) – फ्रान्सेली मिडफिल्डर एनगोलो कान्टेले लन्डन क्लब चेल्सीसँग सम्झौता नवीकरण गरेका छन् । कान्टेले चेल्सीसँग थप पाँच वर्षको लागि नयाँ सम्झौता गरेका हुन् ।

सम्झौता अनुसार कान्टे सन् २०२३ सम्म चेल्सीमा रहनेछन् । २७ बर्षिय कान्टे सन् २०१६ मा लेष्टर सिटीबाट चेल्सीमा अनुबन्ध भएको थिए । लेष्टरलाई सन् २०१६ मा प्रिमियर लिगको उपाधि जिताउन कान्टेले महत्त्वपूर्ण भूमिका निर्वाह गरेका थिए । त्यसलगत्तै चेल्सीलाई सन् २०१७ मा प्रिमियर लिगको उपाधि दिलाउन पनि कान्टेले प्रभावशाली प्रदर्शन गरेका थिए ।

‘पछिल्लो दुई वर्ष मेरो लागि निकै सुखद रह्यो । म अझै यस्तै सुखद क्षण चेल्सीमै बिताउन चहान्छु । जब म चेल्सी आएँ, मैले आफ्नो खेल क्षमताको मदतले चुनौती पन्छाउँदै टोलीको सफलता र केही व्यक्तिगतअवार्डहरु जित्न सफल भए । मलाई यो सहर र क्लब मनपर्छ । म अझै केही समय चेल्सीमै खुसी रहन चाहन्छु,’ सम्झौतापछि कान्टेले भनेका छन् ।

चेल्सीका निर्देशक मारिना ग्रानोभ्सकायाले पनि नयाँ सम्झौता पछि खुसी व्यक्त गरेकी छिन् । ‘जब कान्टे चेल्सीमा आए , हामीले राम्रो खेलाडीलाई सम्झौता गरेको अनुभव गरिसकेको थियौं,’ उनले भनिन् । कान्टेले चेल्सीबाट हालसम्म ८१ खेल खेल्दै ३ गोल गर्न सफल भएका छन् । २७ वर्षीय कान्टे फ्रान्सले रसिया विश्वकपको उपाधि जित्दा टिमका महत्वपूर्ण सदस्य रहेका थिए । उनले फ्रान्सबाट ३६ क्याप जितेका छन् ।