पेरिस (एजेन्सी) – अन्तर्राष्ट्रिय मैत्रीपूर्ण खेल दौरान चोट बोकेका फ्रान्सेली क्लब पेरिस सेन्ट जर्मेन (पीएसजी) का फरवार्डद्वय नेयमार र किलियन एमबाप्पेले लिभरपुलविरुद्धको च्याम्यिनस लिग खेल्ने प्रबल सम्भावना रहेको छ ।

पीएसजीका प्रशिक्षक थोमस टुचेलले अन्तर्राष्ट्रिय मैत्रीपूर्ण खेलमा चोट बोकेका फरवार्डद्वय नेयमार र एमबाप्पेले लिभरपुलविरुद्ध खेल्ने सम्भावना रहेको बताएका छन् । दुवै खेलाडीले शनिबार टोलुसोविरुद्धको लिग वान खेल भने गुमाउनेछन् ।

प्रशिक्षकले शनिबार नेयमार र एमबाप्पेलाई खेलाएर जोखिम नमोल्ने बताएका छन् । तर, उनीहरु बुधबार राति लिभरपुलविरुद्धको खेलमा उपलब्ध हुने प्रबल सम्भावना रहेको उनले बताएका छन् ।

ब्राजिलले क्यामरुनलाई १–० ले पराजित गरेको खेलमा नेयमारले खेलको आठौं मिनेटमा नै तिघ्रामा चोट बोकेका थिए । यता, एमबाप्पेले उरुग्वेलाई १–० ले पराजित गरेको खेलमा काँधमा चोट बोकेका थिए ।

पीएसजीले बुधबार राती च्याम्पियन्स लिगको खेलअन्तर्गत घरेलु मैदानमा लिभरपुलसँग खेल्दैछ । समूह ‘सी’ बाट नकआउट चरणमा प्रवेश गर्न लिभरपुल र पीएसजी दुवैलाई निश्चित जित आवश्यक छ । लिभरपुलको ६ अंक रहेको छ भने पीएसजीको ५ अंक छ । यो समूहबाट नेपोली ६ अंक जोडेर शीर्ष स्थान छ ।