काठमाडौं (हाम्रो खेलकुद) – ब्रिगेड ब्वाइज क्लबले पल्सर ए डिभिजन लिगमा पहिलो जित दर्ता गरेको छ । एक गोलले पछाडी पारेको अवस्थालाई उल्टाउँदै ब्रिगेड ब्वाइजले विभागीय टोली एपीएफलाई ३-१ ले पराजित गरेको हो ।

रुपबहादुर लामा

निकै प्रतिस्पर्धात्मक खेलको पहिलो हाफ गोलरहित बराबरीमा सकिएको थियो । दुवै टोलीले पहिलो हाफमा उल्लेख्य मुभ बनाउन सकेनन् । २७ औं मिनेटमा ब्रिगेड ब्वाइजका रजत तिवारीले पेनाल्टी क्षेत्रबाहिरबाट गरेको प्रहार गोलरक्षक राजु योगीले सहजै बचाए ।

दोस्रो हाफको ६० औं मिनेटमा रुप बहादुर लामाले एपीएफलाई अग्रता दिलाए । पेनाल्टी क्षेत्रबाहिर रुपले गरेको प्रहार डिफ्लेकट हुँदै गोलमा परिणत भएको थियो । त्यसको तीन मिनेटमा नै ब्रिगेड ब्वाइजले बराबरी गोल फर्कायो । मनोज राईले २० यार्ड टाढाबाट फ्रिकीकमा गोल गरे ।

ब्रिगेड ब्वाइजले ६९ औं मिनेटमा अग्रता लियो । काजुदीन आदुउनीले ६ यार्ड बक्सभित्र बाट गोल गर्दै ब्रिगेड ब्वाइजलाई अग्रता दिलाए । ब्रिगेड ब्वाइजका लागि काजिम आदिबोकेले ७५ औं मिनेटमा विजयी गोल गरे । उनले पेनाल्टी क्षेत्रबाहिर बाट उत्कृष्ट भली गोल गर्दै जित पक्का गरे । खेलको ८९ औं मिनेटमा एपीएफका विश्वास उदासले सिधा रातो कार्ड पाएपछि एपीएफ १० खेलाडीमा सिमित भएको थियो ।

यो ब्रिगेड ब्वाइजको लिगमा पहिलो जित हो । ३ खेलमा ब्रिगेड ब्वाइजको ३ अंक भएको छ भने पहिलो हार बेहोरेको एपीएफ ३ खेलमा ४ अंक जोडेको छ ।