काठमाडौं (हाम्रो खेलकुद) – पल्सर सहिद स्मारक ए डिभिजन लिग अन्तर्गत शुक्रबार तीन खेल हुँदैछन् । बिहीबार थ्री स्टारलाई पराजित गरेसँगै मनाङले लिगको शीर्ष स्थानमा ३ अंकको अग्रता बनाएको छ ।

एन्फा कम्प्लेक्समा हुने पहिलो खेलमा अंकविहिन रहेको ब्रिगेड ब्वाइजले एपीएफको सामना गर्नेछ । पहिलो खेलमा मनाङसँग ३-१ ले पराजित ब्रिगेड ब्वाइज दोस्रो खेलमा थ्री स्टारसँग ५-१ ले पराजित भएको थियो । अंक तालिकाको पुछारमा रहेको ब्रिगेड ब्वाइज अंकको खाता खोल्ने सुरमा हुनेछ । यता एपीएफ पहिलो खेलमा हिमालयन शेर्पासँग गोलरहित बराबरीमा रोकिएको थियो । दोस्रो खेलमा भने प्रवीन स्याङतानको अन्तिम मिनेटको गोलमा एपीएफले फ्रेन्ड्सलाई हराएको थियो ।

एन्फामा हुने दोस्रो खेलमा दुई विभागीय टोली भिड्दैछन् । दुवै टोलीले हालसम्म १ जित र १ बराबरी खेलेका छन् । आर्मी पहिलो खेलमा एनआरटीसँग २-२ को बराबरीमा रोकिएको थियो भने दोस्रो खेलमा च्यासललाई १-० ले हराएको थियो । यता पुलिसले पहिलो खेलमा जावलाखेललाई १-० ले हराएपनि दोस्रो खेलमा मछिन्द्रविरुद्ध गोलारहित बराबरीमा रोकियो । यस खेलमा जित हात पर्ने क्लबले अंक तालिकामा थ्री स्टारलाई उछिन्ने अवसर छ ।

हल्चोकमा हुने एकमात्र खेलमा मछिन्द्र र संकटा खेल्दैछन् । संकटाले सुरुवाती दुवै खेलमा जित दर्ता गर्दै लिगमा बलियो सुरुवात गरेको छ । पहिलो खेलमा अन्तिम मिनेटको गोलको मदतले सरस्वतीलाई पाखा लगाएको संकटाले दोस्रो खेलमा अधिकांश समय १० खेलाडी हुनुको बाबजुद जावलाखेलको चुनौती २-० ले पन्छायो । मछिन्द्र भने दुवै खेलमा गोलरहित बराबरी खेल्दै अपराजित छ । पहिलो खेलमा च्यासल र दोस्रोमा पुलिसलाई रोकेको मछिन्द्र अंक नगुमाउने रणनीतिमा नै हुनेछ ।

आजको खेलहरु :

मंसिर ७ : ब्रिगेड ब्वाइज विरुद्ध एपीएफ – ११ बजे – एन्फा कम्प्लेक्स

मंसिर ७ : आर्मी विरुद्ध पुलिस – २:३० बजे – एन्फा कम्प्लेक्स

मंसिर ७ : मछिन्द्र विरुद्ध संकटा – २:३० बजे – एपीएफ रंगशाला

अंक तालिका :