काठमाडौं (हाम्रो खेलकुद) – पल्सर सहिद स्मारक ए डिभिजन लिग अन्तर्गत मनाङ मर्स्याङ्दी क्लबले रुस्लान थ्री स्टार क्लबलाई २-१ ले पराजित गरेको छ । मनाङले पहिलो हाफमा बनाएको २ गोलको अग्रता सम्हाल्दै लिगको शीर्षस्थानमा उक्लिएको हो ।

खेलको ११ औं मिनेटमा अन्जन विष्टले मनाङलाई अग्रता दिलाए । उनले हेमन गुरुङको पासलाई सदुपयोग गर्दै गोल गरेका थिए
१८ औं मिनेटमा मनाङले अग्रता दोब्बर पार्यो । एलन न्यौपानेले क्लियर गरेको बल विजय धिमाललाई लाग्दै गोलमा परिणत भएको थियो । विक्रम लामाले अन्तिम समयमा गोललाइनबाट क्लियर गर्न खोजेपनि उनको प्रयास सफल हुन सकेन ।

खेलको तेस्रो मिनेटमा अजायी मार्टिन्सको विराज महर्जनले बचाएका थिए । २२ औं मिनेटमा रञ्‍जित धिमालको फ्रिकिक क्रसबारभन्दा थोरै माथिबाट बाहिरियो । ३६ औं मिनेटमा सुनील बलको क्रसमा विशाल श्रेष्ठले उत्कृष्ट पन्च गरे । पहिलो हाफको ४ मिनेट बाँकी छँदा सुनिल बलको उत्कृष्ट प्रहारलाई विशालले विफल पारिदिए । यसको एक मिनटमै मार्टिन्सले दिएको पासमा बुद्ध चेम्जोङको प्रहारले पोस्टको दिशा लिन सकेन ।

निकै प्रतिस्पर्धात्मक खेलमा मनाङले दुवै गोल काउन्टर अट्याकमा गरेको थियो । दुवै टोलीले पहिलो हाफमा १-१ परिवर्तन गरेका छन् । रुस्लान थ्री स्टारले निराजन खड्काको स्थानमा विदेशी खेलाडी मेस्सुम्बेलाई मैदानमा उतारेको छ । मनाङले घाइते भएका विशाल राईको स्थानमा पुजन उपरकोटी मैदान प्रवेश गरेका छन् ।

दोस्रो हाफमा थ्री स्टार थप आक्रामक रुपमा प्रस्तुत भयो । अनिल गुरुङको स्थानमा रन्जन विष्ट मैदान प्रवेश गरेपछि थ्री स्टारले दबाब बनाउन सफल रहेको थियो । थ्री स्टारले खेलको ८५ औं मिनेटमा गोल पनि फर्कायो । पेनाल्टी क्षेत्रभित्र मोहमद आसिफले अजायी मार्टिन्सलाई लडाएपछि थ्री स्टारले पेनाल्टी पाएको हो । रञ्‍जित धिमालले उक्त पेनाल्टीमा गोल गर्दै अग्रता कम गरे ।

थ्री स्टारले अन्तिम समयमा आक्रमणलाई थप जोड दिएपनि गोल फर्काउन भने सकेन । यस जितसँगै मनाङ ३ खेलमा ९ अंक जोड्दै अंक तालिकाको शीर्ष स्थानमा उक्लिएको छ । थ्री स्टार भने लिगमा पहिलो हारसँगै ३ खेलमा ६ अंकमा अवस्थित छ ।