काठमाडौं (हाम्रो खेलकुद) – पल्सर सहिद स्मारक ए डिभिजन लिग अन्तर्गत बिहीबारको पहिलो खेलमा भ्याली च्यासल युवा क्लबले न्यू रोड टिम (एनआरटी) लाई ५-१ ले पराजित गरेको छ । च्यासलको जितमा विमल घर्तिमगर र अमिर श्रेष्ठले २-२ तथा सन्तोष साहुखलले १ गोल गरे ।

च्यासलका लागि अमिर श्रेष्ठ खेलको १४ औं मिनेटमा पहिलो गोल गरेका थिए । विमल घर्ति मगरको पासमा सन्जोग राइले बायाँ विङबाट दिएको क्रसमा उनले फार पोस्टमा अनमार्क रहेको अवस्थामा भली प्रहार गर्दै गोल गरेका थिए । अमिरले नै च्यासलको अग्रता दोब्बर पारे । उनले २९ औं मिनेटमा आकर्षक भलीमार्फत गोल गरे । पहिलो गोलझैं अनमार्क रहेका अमिरको प्रहार गोलरक्षकले रोक्ने कुनै मौका पाएनन् ।

एनआरटीका लागि आठौं मिनेटमा राजेश परियारले गरेको फितलो प्रहार गोलरक्षक दिनेश थापामगरले सहजै बचाए । २० औं मिनेटमा एनआरटीकै डिकेश खड्गीले सुशील लामाको पासलाई सदुपयोग गर्न सकेनन् । च्यासलका सन्तोष साहुखलले ३२ औं मिनेटमा पेनाल्टी क्षेत्रभित्र गरेको प्रहारलाई गोलरक्षक सोजित गुरुङले विफल पारिदिए । पहिलो हाफको अन्तिम मिनेटमा अमिरको क्रसमा सन्तोषको हेडरले पोस्टको दिशा लिन सकेन ।

पहिलो हाफमा २-० ले अगाडी रहेको च्यासलले दोस्रो हाफमा ३ गोल थप्यो । ५७ औं मिनेटमा विमल घर्तिमगरले गोल गरे । हेमन्त थापामगरको क्रसमा सन्जोग राईले ६ यार्ड बक्सभित्रबाट दिएको हेडर पासमा विमलले गोल गरे । त्यसपछि सन्तोष साहुखलले ६४ औं मिनेटमा विमलको पासमा गोल गरे । पेनाल्टी क्षेत्रभित्र उनले गोलरक्षक सोजित गुरुङ र डिफेन्डर क्रिस्टियन बासिइलिलाई छक्याउँदै उत्कृष्ट गोल गरे ।

८६ औं मिनेटमा हेमन्त थापामगरको क्रसमा सन्तोष साहुखलले सट प्रहार गर्न नसक्दा फार पोस्ट मा अन्मर्क रहेका विमलको शक्तिशाली प्रहार गोलरक्षक सोजित गुरुङले बचाउन सकेनन् । एनआरटीका लागि इन्ज्युरी समयको पहिलो मिनेटमा मसुदले सान्त्वना गोल फर्काए । अन्तिम मिनेटमा हेमन्त थापामगरको प्रहार क्रसबारमा लागेर फर्कियो ।

च्यासलको जारी लिगमा यो पहिलो जित हो । टोलीको ३ खेलमा ४ अंक भएको छ । एनआरटी भने लगातार दोस्रो खेलमा पराजित भयो । एनआरटीको ३ खेलमा १ अंक छ ।