काठमाडौं (हाम्रो खेलकुद) – पल्सर सहिद स्मारक ए डिभिजन लिग अन्तर्गत बिहीबार रुस्लान थ्री स्टार क्लब र मनाङ मर्स्याङदी क्लबबीच प्रतिस्पर्धा हुँदैछ । खेल एन्फा कम्प्लेक्समा दिउँसो २:३० बजे हुनेछ ।

लिगको सुरुवाती दुई खेलमा दुवै क्लबले जित दर्ता गर्दै लिगको शीर्ष दुई स्थान कब्जा गरेका छन् । विगतमा लिगको अन्तिम चरणमा हुने खेल यसपटक एन्फाले गोलाप्रथा गर्दै खेल तालिका निकालेपछि तेस्रो चरणमा नै भिड्ने भएका हुन् । लिगको उपाधि दावेदारमध्ये बलिया दुई टोलीबीच पछिल्लो समय थ्री स्टार मनाङमाथि हावी हुँदै आएको छ । पछिल्लो समय मोफसलकै प्रतियोगितामा पनि मनाङले थ्री स्टारले हराएको हेर्न केहि वर्ष अगाडीको नतिजा खोतल्न पर्ने हुन्छ ।

अहिले दुवै टोलीमा केहि यस्ता खेलाडी छन् जसले दुवै क्लबको जर्सी लगाईसकेका छन् । बिहीबारको खेलमा यी खेलाडी आफ्नो पूर्व क्लबविरुद्ध उत्रने प्रबल सम्भावना रहेको छ ।

अनिल गुरुङ

यसै सिजन मनाङ छाडेर थ्रीस्टार पुगेका अनिलले लिगको पहिलो खेलमा बेन्चबाट मैदान प्रवेश गरेका थिए । दोस्रो खेलमा थ्री स्टारको सहज जित पक्का भएपछि प्रशिक्षक मेघराज केसीले युवा खेलाडीलाई मौका दिएका थिए । मनाङविरुद्ध अनिल गुरुङले केहि भूमिका खेल्ने अपेक्षा गरिएको छ । अनिलले केहि साताअघि मात्र मनाङ छोड्नुको कारण बताएका थिए । उनले आफू अपमानित भएको महसुस गरेपछि क्लब छाडेको हाम्रोखेलकुदलाई बताएका थिए ।

निराजन खड्का

थ्री स्टारका उपकप्तान समेत रहेका निराजनले यसअघि मनाङबाट खेलेका थिए । त्यसपछि उनले फ्रेन्ड्स क्लबमा पनि खेले । मोफसलका प्रतियोगिता संकटाबाट खेलेका निराजनले थ्री स्टारबाट राष्ट्रिय लिग पनि जितेका थिए ।

विराज महर्जन

मनाङका कप्तान विराज महर्जनले लामो समय थ्री स्टारबाट खेले । उनले क्लबमा रहेर २०६९ को ए डिभिजन लिगको उपाधि पनि उचाले । उनी मनाङ गएयता थ्री स्टारलाई जितेको छैन ।

रुपेश केसी

पछिल्लो पटक राष्ट्रिय लिगमा मनाङको जर्सी लगाएका रुपेश अहिले थ्री स्टारको टोलीमा छन् । दुवै खेलमा उनले पहिलो रोजाईमा खेलेका थिए । मोफसलका प्रतियोगितामा विभिन्न क्लबमा खेलेका उनले लिगमा थ्री स्टार रोजेका हुन् ।

सुरज विकले पनि केहि वर्षअघि सिक्किममा आयोजित गभर्नर्स गोल्डकपमा थ्री स्टारको जर्सी लगाएका थिए । उनले पछिल्लो दुवै खेलमा मनाङको पहिलो रोजाइमा रहँदै दुवै खेल ९० मिनेट खेलेका छन् ।

अघिल्लो राष्ट्रिय लिगमा मनाङको जर्सी लगाएका विशाल श्रेष्ठ यसबीचमा भने क्लबविहिन झैं भए । उनले मोफसलका केहि प्रतियोगितामा थ्री स्टारको जर्सी लगाए । संकटाबाट पनि केहि प्रतियोगिता खेले । लिगको सुरुवाती दुवै खेलमा विशाल नै पहिलो रोजाइमा खेल्दै आएका छन् ।

प्रकाश बुढाथोकी भुटानको पारो एफसी बाट लिग खेलेर फर्केका हुन् । उनले त्यसअघि मोफसलमा संकटाबाट खेलेका थिए । राष्ट्रिय लिगमा थ्री स्टारबाट खेलेका प्रकाश मनाङबाट पहिलो खेलमा घाइते भएपछि भोलीको खेलमा उपस्थित हुने छैनन् ।

ओलावाले आफिज पछिल्लो पटक थ्री स्टारलाई राष्ट्रिय लिग जिताउँदा मुख्य सदस्य रहेका थिए । त्यसपछि मनाङ पुगेका उनले बिचमा बंगलादेशको लिग पनि खेले । केहि महिनाअघि मनाङ आएका आफिज लिगको सुरुवाती दुई खेलमा पहेंलो कार्ड पाएका कारण उपलब्ध छैनन् ।

अनन्त तामाङले पछिल्लो दुई वर्ष मोफसलको केहि प्रतियोगितामा मनाङबाट खेले । हाल थ्री स्टारमा रहेका उनी चोटका कारण यस खेलमा उपलब्ध छैनन् । उनले अर्को साता मैदानमा पुनरागमन गर्ने सम्भावना रहेको छ ।