काठमाडौं (हाम्रो खेलकुद) – पल्सर सहिद स्मारक ए डिभिजन लिगअन्तर्गत सोमबारको पहिलो खेलमा सीएमजी क्लब संकटाले जावलाखेल युवा क्लबलाई २-० ले पराजित गरेको छ । १० खेलाडीमा सिमित संकटाको जितमा सेड्रिक अबाले २ गोल गरे ।

खेलको १९ अौं मिनेटमा संकटा १० खेलाडीमा सिमित भएको थियो । पहिलो पहेंलो कार्ड पाएको एक मिनेट नबित्दै एलोन म्याक्सवेलले दोस्रो पहेंलो कार्ड पाएपछि संकटाले बाँकी समय एक खेलाडी कममा खेल्नुपरेको हो । एलोनले जावलाखेलका डिफेन्डर अडामा डुम्बियालाई लगातार फल हानेका थिए । दुवै टोलीले पहिलो हाफमा अाक्रमक मुभ बनाउन सकेनन् ।

दोस्रो हाफको सुरुवातमै जावलाखेलले अग्रता लिने मौका पायो । कुलदीप कार्कीको फ्रिकिकमा डुम्बियाको हेडरलाई संकटाका गोलरक्षक राजाबाबु थापाले सुन्दर बचाउ गरे । खेलको ५८ अौं मिनेटमा संकटाले अग्रता लियो । सुभाष गुरुङको कटब्याकमा सेड्रिक अबाले पेनाल्टी क्षेत्रभित्रबाट गोल गर्दै अग्रता दिलाए ।

अबाले नै ८५ अौं मिनेटमा संकटाको अग्रता दोब्बर पारे । लक्ष्मण रुचालले दिएको पासमा अबाले ६ यार्ड बक्सबाट ब्याकहिलमा गोल गरे ।

लगातार दोस्रो जित दर्ता गरेको संकटा अंक तालिकाको तेसरते स्थानमा उक्लिएको छ । २ खेलमा ६ अंक जोडेको संकटा गोलअन्तरमा रुस्लान थ्री स्टार र मनाङभन्दा पछाडि छ । जावलाखेल भने अझै अंकविहिन छ ।