लन्डन (एजेन्सी)– वायन रुनीले इग्ल्यान्डका लागि बनाएको सर्वाधिक गोल गर्ने खेलाडीको कीर्तिमानलाई आफुले तोड्नेमा आशावादी रहेको ह्यारी केनले बताएका छन् । आइताबर क्रोएसियासँग खेल्नुअघि सात खेलमा गोलविहिन रहेका इंग्ल्यान्ड कप्तान केनले विश्वकपमा भने गोल्डेन बुट जितेका थिए ।

उनको कप्तानीमा इग्ल्यान्डले विश्व कपको सेमिफाइनल सम्मको यात्रा तय गरेको थियो । सेमिफाइनलमा इग्ल्यान्ड क्रोएसियासँग पराजित भएको थियो । सोही क्रोएसियासँग आइतबार प्रतिस्पर्धा गर्दा इग्ल्यान्ड २–१ ले विजयी भएको थियो । जसमा केनले निर्णायक गोल गरेका थिए ।

पूर्व कप्तान रुनीले बिहीबार अमेरिकासँग मैत्रीपूर्ण खेल खेले । त्यो उनको इग्ल्यान्डका लागि विदाई खेल थियो । रुनीले १ सय २० खेल खेल्ने क्रममा इग्ल्यान्डका लागि ५३ गोल गरेका थिए । २५ वर्षे केनले अहिले सम्म इग्ल्यान्डका लागि २० गोल गरेका छन् ।

केनले एक दिन रुनीको कीर्तिमान तोड्ने र त्यसका लागि दीर्घकालिन योजना रहेको बताएका छन् । ‘निश्चय नै त्यो सम्भव छ,’ रुनीको कीर्तिमान भंग गर्न सकिन्छ भन्ने प्रश्नमा केनको जवाफमा थियो, ‘त्यहाँ सम्म पुग्न कठिन छ । अहिले त्यो विषयमा सोचेको छैन । तर, भविष्यमा त्यो सम्भव छ भन्ने लाग्छ ।’

उनले आउने दिनमा आफुले गर्ने प्रदर्शनमा पनि त्यो निर्भर हुने केनको विश्वास छ । ‘आउने वर्षहरु मेरो प्रदर्शनमा निर्भर गर्छ , ‘ उनले थपे, ‘मेरो स्वास्थ्यले साथ दियो भने प्रशिक्षकको छनोटमा परे भने त्यो उपलब्धी प्राप्त गर्न सकिन्छ । तर अहिले म यो विषयमा सोचिरहेको छैन ।’