लन्डन (एजेन्सी)– इग्ल्यान्डका कप्तान ह्यारी केनले क्रोएसिया एवंम् रियल म्याड्रिडका स्टार लुका मोड्रिचको खुलेर प्रशंसा गरेका छन् । केनले मोड्रिच यो वर्ष मनोनयनमा परेका सबै अवार्ड जित्न योग्य रहेको दाबी गरेको गरेका छन् ।

मोड्रिच र केनले केहि समय टोटेनह्याममासँगै खेलेका थिए । टोटेनह्याम छाडेर रियल गएदेखि मोड्रिच क्लबको सफलताका लागि महत्वपूर्ण रहँदै आएका छन् । खेल जीवनमा उनले जुन प्रदर्शन र सफलता प्राप्त गरेका छन्, त्यसका आधारमा यो वर्ष सबै व्यक्तिगत अवार्ड जित्नका लागि मोड्रिच योग्य रहेको केन मान्छन् ।

युइएफएले नेसन्स लिगमा इग्ल्यान्ड र क्रोएसियाबीचको खेलअघि केनले भने, ‘उनी आफ्नो खेल जीवनको उच्च विन्दुमा छन् । मैले युवा अवस्थामा केहि समय स्पर्समा उनीसँग खेल्ने मौका पाएको थिए, ’ केन त्यसमा रोकिएनन्, ‘सबैलाई थाहा छ उनी कति क्षमता भएका खेलाडी हुन । यो वर्ष उनले निकै उच्च प्रदर्शन गरे, जुन अवार्ड जिते त्यसको उनी हकदार थिए । ’

विश्व कपमा मोड्रिचको कप्तानीमा रहेको क्रोएसियासँग केनको इग्ल्यान्ड पराजित भएको थियो । ‘विश्व कपको सेमिफाइनल हाम्रो लागि दुःखदायी रह्यो,’ केनले भने, ‘ठूलो खेल गुमाउँदै । हामीले किन त्यो बेला राम्रो गर्न सकेनौं भन्ने लागि रहन्छ ।’

विश्व कपको फाइनलमा क्रोएसिया फ्रान्ससँग पराजित भएको थियो । मोड्रिच विश्व कपका गोल्डेन बल जितेका थिए । नेसन्स कपमा आइतबार भएको खेलमा इंग्ल्यान्डले क्रोएसियालाई हराउँदै अन्तिम ४ मा स्थान बनाएको छ ।