एजेन्सी – बार्सिलोना कप्तान लिओनेल मेसी र म्यानचेस्टर युनाइटेडका मिडफिल्डर पल पोग्बा शुक्रबार दुबईस्थित एक रेस्टुरेन्टमा सँगै देखिएका छन् । अन्तर्राष्ट्रिय ब्रेकको छुट्टीमा दुई खेलाडी एकै ठाउँमा देखिएका हुन् ।

पछिल्लो समय म्यानचेस्टर युनाइटेडमा प्रशिक्षक जोसे मोउरिन्होसँगको खटपटका कारण चर्चामा आएका मिडफिल्डर पोग्बा बार्सिलोना जाने हल्ला पनि चलेको थियो । सन् २०१२ मा युनाइटेड छाडेर युभेन्ट्स पुगेका पोग्बा सन् २०१६ मा युनाइटेड नै फर्केका थिए । तर युनाइटेड आएपछि भने युभेन्ट्सको जस्तो प्रदर्शन गर्न पोग्बाले सकेका छैनन् । विश्व कीर्तिमानी रकममा युनाइटेड आएका उनले क्लब छाड्ने हल्ला पनि चलेको छ ।

यसअघि जेरार्ड पिकेले पोग्बा बार्सिलोना आउन चाहे खुलेर स्वागत गर्ने बताएका थिए । ‘ उनी बार्सिलोना आए हामी खुसी हुन्छौं । म्यानचेस्टरमा उनलाई केहि समस्या भइरहेको हामीले थाहा पाएका छौं । उनी निकै राम्रा खेलाडी हुन् । अहिले उनी युनाइटेडमा भएपनि भविष्यमा हामीसंग खेल्ने सम्भावना पक्कै छ,’ पिकेले भने । पिके पनि युनाइटेडबाट बार्सिलोना पुगेका थिए ।

मेसी र पोग्बाको भेटले कुनै यकिन संकेत नगरेपनि पोग्बा र बार्सा खेलाडीको निकटता भने देखाएको छ । युनाइटेडमा पोग्बाको सम्बन्ध चिसिनु र बार्सिलोनामा बढ्नुले पनि युनाइटेड समर्थकलाई समस्या हुन सक्छ । अन्तर्राष्ट्रिय ब्रेकमा दुवै खेलाडी हाल राष्ट्रिय टोलीबाट विश्राममा छन् । पोग्बा चोटका कारण बाहिर छन् भने मेसीले विश्वकपपछि राष्ट्र्रिया टोलीबाट खेलेका छैनन् ।