एजेन्सी – इंग्लिस क्लब चेल्सी तथा बेल्जियन राष्ट्रिय टोलीका स्टार मिडफिल्डर इडेन हाजार्डले फ्रान्सेली युवा स्टार किलियन एमबाप्पे प्रतिष्ठित ब्यालोन डी’ओर उपाधिको हकदार रहेको बताएका छन् ।

उपाधि दौडमा आफैं सामेल भएका हाजार्डले एमबाप्पेलाई उपाधि दावेदार भएको बताएका हुन् । विश्वकपमा बेल्जियमलाई सेमिफाइनलसम्म पुर्याउन प्रभावशाली प्रदर्शन गरेका हाजार्ड चेल्सीका लागि पनि उत्कृष्ट प्रदर्शन गरिरहेका छन् । तर यसका बाबजुद पनि हाजार्डले फ्रान्सलाई विश्वकप उपाधि दिलाउन महत्त्वपूर्ण भूमिका निर्वाह एमबाप्पे नै उपाधिको हकदार भएको बताउँछन् ।

‘ मेरो लागि व्यक्तिगत रुपमा यो वर्ष निकै राम्रो रहयो । तर यसको मतलब मैले ब्यालोन डी’ओर जित्नुपर्छ भन्ने होइन । धेरै खेलाडीले मभन्दा राम्रो प्रदर्शन गरेका छन्,’ उनले भने, ‘ मैले उपाधि जित्नेमा मोड्रीचको नाम लिन्थें तर विश्वकपपछि उनले राम्रो प्रदर्शन गर्न सकेका छैनन् । तर किलियनले भने लगातार आफ्नो प्रदर्शन सुधार्दै आएका छन् ।’

‘मेरो लक्ष्य ब्यालोन डी’ओर जित्नु भन्ने छैन । मैले राम्रो प्रदर्शन गर्नुपर्यो र खेल्दा आनन्द आउनुपर्यो । मैले आफ्नो प्रदर्शन दिंदै जाँदा एकदिन यो उपाधि जित्न सकें भने म खुसी हुन्छु । तर जितिन भने पनि दुखमनाउ गरेर बस्ने छैन,’ हाजार्डले थपे । हाजार्डले यस सिजन प्रिमियर लिगमा आठ खेलमा सुरुवात गर्दै ७ गोल र ४ असिस्ट दिइसकेका छन् ।

यस वर्ष ब्यालोन डी’ओर उपाधिको दौडभने पछिल्लो एक दशककै सबैभन्दा प्रतिस्पर्धात्मक मानिएको छ । क्रिस्टियानो रोनाल्डो र लिओनेल मेसीको दबदबा रहँदै आएको उपाधिमा यसपटक दुवै खेलाडीको दावेदारी कमजोर रहेको छ । विश्वकपमा खराब प्रदर्शन गरेपछि दुवैको सम्भावना कम भएको हो । लुका मोड्रीचलाई उपाधि दावेदार मानिएपनि उनले विश्वकप पछि रियल म्याड्रिडबाट कमजोर प्रदर्शन गरेका कारण सम्भावना कम रहेको छ ।