एजेन्सी – अन्तर्राष्ट्रिय मैत्रीपूर्ण खेलअन्तर्गत शुक्रबार राती भएको खेलमा अर्जेन्टिनाले मेक्सिकोलाई पराजित गरेको छ । दुवै हाफमा १-१ गोल सम्भव हुँदा अर्जेन्टिना २-० ले विजयी रहयो ।

खेलको दोस्रो मिनेटमा नै मेक्सिकोले अग्रता लिने सुवर्ण अवसर गुमायो । मार्को फाबियनको क्रसमा राउल जिमिनेजको डाइभीङ हेडर क्रसबारमा लागेको थियो । त्यसको एक मिनेटमा नै डिफेन्डर फुनेस मोरीले गल्ति गर्दा एलान पुलिडोको पासमा फाबियनको प्रहारलाई गोलरक्षक अगुस्टिन मार्चेसिनले बचाए । सुरुवाती समयमा दबाब खेपेको अर्जेन्टिनाले भने त्यसपछि खेलमा लय समात्यो ।

पाउलो डिबाला र लौटारो मार्टिनेजलाई आक्रमणमा खेलाएको अर्जेन्टिनाले मेक्सिकोलाई समस्या दिइरहयो । डिबालाले ३८ औं मिनेटमा गरेको फ्रिकिकमा मार्टिनेजको प्रहार मेक्सिकोका गोलरक्षक गिल्लेर्मे ओचोआले बचाए । तर त्यसको केहि बेरमै डिबालाको अर्को फ्रिकिकमा फुनेस मोरीको हेडर गोलमा परिणत भयो ।

दोस्रो हाफमा पनि डिबाला नै नायक रहे । उनले माउरो इकार्डीलाई दिएको चिप पासलाई मेक्सिकन डिफेन्डर ब्रिजुएलाले क्लिअर गर्ने धुनमा आफ्नै पोस्टको दिशा दिए । यस नतिजासँगै कार्यवाहक प्रशिक्षक लिओनेल स्कालोनीलाई केहि राहत पुगेको छ । उनको नियुक्ति भएयता अर्जेन्टिनाले कोलोम्बियासँग बराबरी र ब्राजिलसँग हार बेहोरेको थियो । इराक र ग्वाटेमालालाई पराजित गरेपनि टोलीको खेल भने सन्तोषजनक रहेको थिएन ।