म्याड्रिड (एजेन्सी)– रियल म्याड्रिड एवंम् क्रोएसियाका मिडफिल्डर लुका मोड्रिचले यो वर्ष बालोन डि ओर अवार्ड जित्न असफल भएको खण्डमा पनि यो वर्ष आफ्नो खेल जीवनको सबैभन्दा उत्कृष्ट वर्ष रहने बताएका छन् ।

रुस विश्वकपका प्रभावशाली खेलाडी मध्येका एक मोड्रिचले क्रोएसियालाई फाइनल सम्म पुर्याउन महत्वपूर्ण भूमिका निर्वाह गरेका थिए । उनले रसियामा गोल्डेन बल उपाधि समेत जितेका थिए । त्यस्तै उनको उच्च प्रदर्शन समेत रहेको रियलले लगातार तेस्रो पटक च्याम्पियन्स लिग उपाधि जितेको थियो ।

द वेस्टको अवार्ड जितेपछि मोड्रिचले बालोन डी ओरमा क्रिस्टियानो रोनाल्डो र लियोनल मेस्सीको दबदबालाई अन्त्य गर्ने अनुमान गरिएको छ । तर, बालोन डी ओर जित्नु वा नजित्नुले २०१८ को आफ्नो उपलब्धीलाई खासै फरक नपार्ने बताएका छन् ।

‘हेरौं के हुन्छ ,’ नेसन्स लिगमा शुक्रबार स्पेनलाई क्रोएसियाले ३–२ ले हराएपछि मोड्रिचले भने, ‘उपाधिको दौडमा छु त्यसमा खुसी छु । मैले जिते भने निश्चय पनि खुसी लाग्नेछ । तर, जित्न असफल भएपनि त्यसले खासै फरक पर्ने छैन । बोलोन डी ओर जिते र वा नजितेर पनि यो वर्ष मेरो खेल जीवनको सफल बर्ष हो ।’

रियलका पछिल्लो प्रदर्शनका विषयमा बोल्दै मोड्रिचले नयाँ प्रशिक्षक सान्टियागो सोलारीको आगमन पछि टोलीमा परिवर्तन भइरहेको बताएका छन् । बर्खास्तमा परेका प्रशिक्षक जुलेन लेपेटेगुइको प्रशिक्षणमा मोड्रिचले संघर्ष गरिरहेका थिए । तर, नयाँ प्रशिक्षकको आगमनसँगै मोड्रिच पनि विस्तारै लयमा देखिएका छन् ।

‘सोलारीको आगमन पनि हामीले राम्रो सुरुवात गरेका छौं । पछिल्ला ४ खेललाई हेर्न सकिन्छ । उनको आगमनले राम्रो भएको छ र आशा छ यो प्रदर्शनले निरन्तरता पाउनेछ,’ उनले थपे, ‘दिन प्रतिदिन आनन्द महसुस गरिरहेको छु । विश्वकपको लगत्तै मैदानमा फर्कनु परेको छ । पछिल्लो केहि खेलबाट शारीरिक रुपमा पनि मैले सहज महसुस गरिरहेको छु ।’