एजेन्सी – क्याटलान क्लब बार्सिलोनाले गत सिजन ट्रान्सफर विन्डोमा फ्रान्सेली युवा स्टार किलियन एमबाप्पेलाई नकार्दै ओस्मान डेम्बेलेलाई भित्र्याएको खुलासा भएको छ ।

बार्सिलोनासँग लामो समयदेखि निकट रहेका एजेन्ट जोसेप मारिया मिन्गुएलाले ला लिगा क्लब बार्सिलोनालाई एमबाप्पेलाई अनुबन्धन गर्ने प्रस्ताव राखेका थिए । बार्सिलोनासँग जोसेपको राम्रो सम्बन्ध छ । सन् २००० मा लिओनेल मेसीलाई बार्सिलोना भित्र्याउन जोसेपले नै क्लबमा प्रस्ताव ल्याएका थिए । त्यसअघि डिएगो म्याराडोना र स्टोइच्कोभलाई क्याटलान क्लबमा ल्याउन पनि उनको नै भूमिका रहेको थियो ।

जोसेपले पछिल्लो अगस्टमा बार्सिलोनाले नेयमारलाई पीएसजी पठाएपछि एमबाप्पेलाई क्लबमा आबद्ध गर्ने प्रस्ताव राखेका थिए । उनले राखेको प्रस्तावलाई क्लबले कुनै प्रतिक्रिया नै नदिएको उनले बताएका छन् । एमबाप्पेले पनि क्याम्प नोउ आउने इच्छा देखाएको र क्लबलाई पनि आक्रमणमा खेलाडीको खाँचो परेको हुनाले दुवै पक्षलाई फाइदा हुने उनको बुझाई थियो ।

एमबाप्पेलाई बार्सिलोना अनुबन्धन गर्न नसकेपछि पीएसजी लागेका थिए । उनले पीएसजी पुगेपछि लगातार सफलता हात पार्दै आएका छन् । उनले पहिलो सिजन लोनमा पुगेपनि यस सिजन भने स्थायी रुपमा पीएसजी खेलाडी भएका छन् । यस सिजन १३ खेलमा १३ गोल गरेका उनले ६ असिस्ट पनि दिएका छन् । विश्वकपमा पनि एमबाप्पेले उत्कृष्ट युवा खेलाडीको उपाधि हात पारेका थिए ।

यता बार्सिलोनामा भने डेम्बेलेले औसत प्रदर्शन गरेका छन् । मैदानबाहिर अनुशासनको समस्याले पनि प्रशिक्षक एर्नेस्टोले उनलाई टोलीबाट बाहिर राखेका छन् । उनी यसै जनवरी टोलीबाट बाहिरिने सम्भावना पनि उत्तिकै छ । माल्कमको आगमनले पनि उनलाई मैदानमा समय पाउन थप मिहिनेत गर्नुपरेको छ ।